© AP Photo / Rodrigo Abd
Qazaqstanda qyzmettik mindetin atqarý kezinde qaza tapqan ormanshylardyń otbasyna aqshalai tólemder beriledi, - dep habarlaidy Tengrinews.kz saity.
Ekologiia ministrliginiń Orman sharýashylyǵy jáne janýarlar dúniesi komiteti qyzmettik mindetterin atqarý kezinde alǵan mertigý (jaraqat, kontýziia) saldarynan qaza tapqan memlekettik orman kúzeti qyzmetkeriniń otbasy múshelerine aqshalai tólemdi jasaý qaǵidalary men mólsherin bekitý týraly qaýlynyń jobasyn usyndy. Qujat 2023 jylǵy 11 maýsymda Abai oblysyndaǵy tabiǵi órtti joiý jónindegi jedel shtab otyrysynda Prezidenttiń tapsyrmasy negizinde ázirlengeni aityldy.
Erejege sáikes, memlekettik orman kúzeti qyzmetkeriniń otbasy músheleri, atap aitqanda olardyń jubaiy, balalary, onyń ishinde asyrap alǵan balalary, ógei balalary, birge turatyn ógei uldary men kámeletke tolǵanǵa deiingi ógei qyzdary tólemaqy ala alady.
Tólemderdi alý úshin birqatar qujat pen ótinish berý qajet: qyzmetkerdiń qaitys bolǵany týraly kýálik, nekeni nemese týýdy tirkeý týraly kýálik jáne basqalar. Qujattar tolyq usynylmaǵan jaǵdaida ótinish berilgen kúnnen bastap on jumys kúni ishinde qaitarylýǵa tiis. Kelip túsken qujattardy teksergennen keiin ýákiletti organ jeke isti qalyptastyrady, onda qaza tapqan adamnyń aqshalai qarajatynyń mólsheri týraly qarjy bólimshesiniń anyqtamasy, qyzmetkerdiń, kýrsanttyń, áskeri qyzmetshiniń qaza bolýynyń (qaitys bolýynyń) sebepteri men mán-jailaryn qyzmettik tekserý materialdary bolýǵa tiis.
Aqshalai tólemderdi taǵaiyndaý qyzmetkerdiń, kýrsanttyń, áskeri qyzmetshiniń óliminiń sebebi men onyń qyzmettik mindetterin atqarý kezinde alǵan jaraqaty arasynda tikelei sebep-saldarlyq bailanys bolǵan kezde júrgiziledi.
"Memlekettik orman kúzetiniń qaza tapqan (qaitys bolǵan) qyzmetkeriniń árbir otbasy múshesine aqshalai tólem qaza tapqan qyzmetkerdiń sońǵy atqarǵan laýazymy boiynsha aqshalai qarajattyń 40 paiyzy mólsherinde júzege asyrylady. Bul rette otbasynyń barlyq múshelerine tólenetin aqshalai tólemderdiń eń joǵary mólsheri aqshalai qarajattyń júz paiyzynan aspaýǵa tiis. Úsh jáne odan da kóp otbasy músheleri bolǵan jaǵdaida, árqaisyna aqshalai tólemderdiń mólsheri aqshalai qarajattyń 100 paiyzynyń teń úlesi retinde esepteledi", - delingen qujat jobasynda.
Eske salsaq, 8 maýsymda Abai aýdanynda órt shyǵyp, ol 0,3 gektardan 60 myń gektarǵa deiin tarady. Órt kezinde "Semei ormany" respýblikalyq memlekettik kásipornynyń Jańa Shúlbi filialynyń 14 qyzmetkeri qaza taýyp, keiinirek orman sharýashylyǵynyń taǵy bir qyzmetkeriniń denesi tabyldy.
