Bilim jáne ǵylym ministrligi áleýmettik jelide taraǵan 1 synyp oqýshylaryna arnalǵan tapsyrma daýyna qatysty resmi túsinikteme berdi, dep habarlaidy "Ult aqparat".
«BAQ pen áleýmettik jelilerde talqylanyp jatqan qazaq tilinde bilim beretin mektepterdiń 1-synyp oqýshylaryna arnalǵan «Meniń altyn jazý úlgim» atty jazý dápterleri «8&8» baspasynda jaryq kórdi, avtory - S.V. Trofimova. Bul dápter orta bilim berý uiymdary úshin bekitilgen oqýlyqtar men oqý-ádistemelik keshenderdiń bekitilgen tizbesine engizilmegen. Tiisinshe, memlekettik saraptamadan da ótpegen», - delingen habarlamada.
Ministrliktiń málimetinshe, mektep oqýlyqtary men oqý-ádistemelik keshender QR «Bilim týraly» zańyna sáikes saraptamadan ótedi.
«Oqý-ádistemelik keshen degenimiz – oqýlyqty súiemeldeitin, mindetti talaptarǵa sáikes ázirlengen ádistemelik nusqaýlyq, jumys dápteri, hrestomatiia, diktanttar jinaǵy, tapsyrmalar men jattyǵýlar jinaǵy, kartografiialyq atlas. Atalǵan jazý dápteri sekildi qosymsha oqý basylymdaryn, oqýlyqtardy, dápterlerdi jáne basqa qosymsha materialdardy tańdaý quqyǵy bilim berý uiymdaryna berilgen. Mundai jaǵdailardy boldyrmaý úshin joǵaryda kórsetilgen máselelerdi retteý múmkindigi qaralatyn bolady», - dep habarlandy atalǵan vedomstvodan.
Osy oraida ministrlik bekitilmegen basylymdar ashyq satalymda jáne ol internette de qoljetimdi ekenin eskertedi.
Sondai-aq, elimizde qosymsha oqýlyqtar, ertegi jinaqtary men dápterlerdiń arnaiy bekitilmeitini aityldy.
Aita ketsek, áleýmettik jelide 1 synyp oqýshylaryna arnalǵan jazý dápterinde «Ól» degen jazýdyń bary jurtshylyqtyń talqysyna tústi.
