QR Ekologiia, geologiia jáne tabiǵi resýrstar ministri Serikqali Brekeshev Batys Qazaqstan oblysy orman sharýashylyǵy jáne janýarlar dúniesi aýmaqtyq inspektsiiasynyń bólim basshysy Serik Májenovtiń ólimine qatysty pikir bildirdi, dep habarlaidy QazAqparat.
«Politsiia taratqan nusqa boiynsha marqum Serik Májenov ań aýlap júrip qaitys bolǵan. Úsh adam bolǵan. Sonyń biri inspektor dep otyr. Biraq marqumnyń otbasy qaiǵyly oqiǵa reid kezinde bolǵanyn aityp otyr. Tipti ony reidke attanǵany týraly qaǵaz da bar eken. Aýmaqtyq inspektsiianyń basqa qyzmetkerleri de politsiia usynǵan nusqaǵa senbeitinin aitty. Olar qaiǵyly oqiǵa brakonerlerdi ustaý kezinde bolǵan dep topshylaidy. Eger politsiia aitqandai, ań aýlap júrgen bolsa, qasyndaǵy eki adam kim? Ol jerde shyn máninde ne bolǵan? Sizde qandai aqparat bar?», - dep surady búgin ministrden BAQ ókili.
Ministr tergeý amaldary aiaqtalǵan kezde ǵana naqty shyndyq belgili bolatynyn aitty.
«Ókinishke qarai, osyndai jaǵdai boldy. Osy sátti paidalanyp, qaitys bolǵan áriptestimizdiń otbasyna ministrliktiń atynan taǵy da kóńil aitqym keledi. Bastapqy nusqa boiynsha, bul - kezdeisoq oryn alǵan qaiǵyly oqiǵa. Qazir tiisti organdar tergeý sharalaryn júrgizip jatyr. Búgingi tańda bizde ázirge tolyq senimdi aqparat joq. Tergeý qorytyndysynyń aiaqtalǵanyn kútemiz», - dedi Serikqali Brekeshev.
