Bilim jáne ǵylym ministri Ashat Aimaǵambetov elimizde oqytýshylardy jataqhanada kezekshilikke jegip qoiatyn oqý orny basshylaryn synǵa aldy, dep habarlaidy QazAqparat.
«Biz monitoring júrgizdik. Baiqaǵanymyzdai, áli de bolsa keibir joǵary oqý oryndarynda oqytýshylardy jataqhanada kezekshi etip qoiý tyiylmaǵan. Júkti oqytýshylardyń moinyna arta salǵan. Oqytýshylar negizgi jumysynan bólek, kezekshilik mindetin atqarady. Eger jataqhanada qandai da bir shara ótip, oǵan oqytýshylar tartylsa jóni bólek. Jataqhanadaǵy kezekshilikti ustazdarǵa júkteý durys emes. Bul ótken ýaqyttyń ádisi jáne ol tiimsiz. Eger jataqhanadaǵy stýdentterdiń qaýipsizdigin oilasańyzdar, shtattan arnaiy oryn bólip, bólek qyzmetker alyńyzdar. Sóitip jumysty júieli atqaryńyzdar», - dedi Ashat Aimaǵambetov ministrlikte ótken apparat keńesiniń jiynynda.
Sondai-aq, ministr stýdentterdiń ózin-ózi basqarý qyzmetine qatysty pikir bildirdi.
«Keibireýler aityp jatyr, ózin-ózi basqarýdyń JOO-na qatysy qansha dep. Ýniversitettiń úzdik bilim berýi ǵana emes onyń jumysynyń ilgerileýine stýdentterdiń tikelei qatysy bar. Osy oraida olarmen birlesip jumys istep, stýdentterdiń únine qulaq asyp, múmkindik berý kerek. Ózin-ózi basqarý stýdentterdiń uiymdastyrýshylyq qabiletin arttyryp, qoǵamdyq sharalarǵa belsene aralasýyna septigin tigizedi. Osyǵan orai elimizdiń ár joǵary oqý orny boiynsha stýdentterdiń ózin-ózi basqarý qyzmetine taldaý júrgizýdi tapsyramyn. Jalpylama kerek emes, ár ýniversitet pen kolledjdiń jumysyna jeke-jeke taldaý jasalsyn», - deidi ol.
