QR Bilim jáne ǵylym ministri Ashat Aimaǵambetov mektep bitirýshilerdi Ulttyq biryńǵai testileýden qoryqpaýǵa shaqyrdy, dep habarlaidy "Ult aqparat".
«Jaqynda basym kópshiligińiz UBT tapsyrasyzdar. Odan qorqýdyń eshqandai qajeti joq dep sizderge aitqym keledi. Bul - tek qana jai synaq. Onyń ústine bul ómirlerińizdegi eń jeńil emtihannyń biri bolady», - dedi Ashat Aimaǵambetov Facebook paraqshasynda jariialanǵan quttyqtaýynda .
Ministr «ainaladaǵy adamdar qolyńnan eshteńe kelmeidi» dese de tabandylyq pen sabyrlyq, kúndelikti qajyrly eńbek pen alǵa qoiǵan maqsattaryńyz belgili bir nátije ákeletindigin esten shyǵarmaý kerektigin atap ótti.
«Nátije árine, óz betimen kelmeidi. Ol qatelikpen qatar júredi. Kishkentai kezimizden bizdi «qatelik jasaý durys emes, keshirimsiz» dep sendirgen. Mektep qabyrǵasynan bastap qatelik jasamaý bizdiń sanamyzǵa quiyp keldi. Tabysty adam eshqashan qatelespeidi degen qate uǵym ekenin aitqym keledi. Alaida, bári qatelik jasaidy. Bastysy - odan sabaq alyp, tájiribe jinaqtaý. Qatelik jasap, bárin qaita bastaýdan qoryqpaý qajet», - dedi ministr.
Osy rette ol biylǵy jas túlekter Qazaqstannyń ǵana emes álem tarihyndaǵy erekshe túlekter ekendigin basa aitty.
«Sizder jaqsy tájiribe jinaqtap, oi túiip, álemdi jaqsartýǵa úles qosasyzdar dep senemin. Elge paidasy tietin jańalyq ashyp, tolaǵai tabysqa jetetsizder dep úmittenemin. Sizder tamasha kezeńde ómir súrip jatyrsyzdar. Qazirgi kezeń armandaityn, batyl sheshimder qabyldaityn ýaqyt. Belgisizdikter men ózgeristerdiń ýaqytynda sizderdiń basty qundylyqtaryńyz adaldyq, ádildik, mahabbat, qarapaiymdylyq pen batyldyq bolýy kerek. Sáttilik serik bolsyn! Armandaryńyzǵa qol jetkizip, ómir qundylyqtaryn esten shyǵarmańyzdar!», - dedi Ashat Aimaǵambetov.
