Oqý-aǵartý ministri Ashat Aimaǵambetov kópqabatty úidiń terezesinen qulap ketkeli turǵan balany aman alyp qalǵan elordalyq mektep túlegi Esdáýlet Dáýitbekovpen kezdesti. Sondai-aq kezdesýge 17 jastaǵy batyrdyń anasy Ásemgúl Qabdyqalyqova da qatysty, dep habarlaidy "Ult aqparat" ministrliktiń baspasóz qyzmetine silteme jasap.
Ashat Aimaǵambetov Esdáýletke kórsetken qaisarlyǵy úshin alǵysyn bildirip, ózinen kishilerge kómek berýge jáne olardy qorǵaýǵa daiyn bolýy elimizdiń barlyq oqýshysy úshin úlgi-ónege ekenin atap ótti.
«Sizge kórsetken qaisarlyǵyńyz ben batyldyǵyńyz úshin alǵys aitqym keledi. Siz oqýshynyń mektep qabyrǵasynan qalai túlep ushýy kerek ekenin dáleldedińiz. Osyndai asyl, batyr azamatty tárbielegen ata-anańyz ben ustazdaryńyzǵa alǵys aitamyn.
Prezident búgin mektepterdegi býlling faktilerine alańdaitynyn aitqan edi. Sizdiń búgingi erligińiz laiyqty úlgi bolady. Joǵary synyp oqýshylary da siz siiaqty kishkentailardy qoldaýǵa jáne qorǵaýǵa árqashan daiyn bolady dep senemin.
Sonymen birge kámeletke tolmaǵan balalardyń ata-analarynan olardyń úidegi qaýipsizdik máselesine basa nazar aýdarýyn suraimyn», - dedi vedomstvo basshysy.
Kezdesý sońynda Ashat Aimaǵambetov Esdáýlet Dáýitbekovke alǵys hat pen estelik syilyqtar tabys etti. Sondai-aq ministrdiń ótinishi boiynsha túlekke Almatydaǵy Narhoz ýniversitetinde tegin oqýǵa grant berildi.
«Joǵary bilim berý sapasymen tanymal jáne áleýmettik qoldaý kórsetýde belsendi pozitsiiany ustanatyn elimizdegi jetekshi joǵary oqý oryndarynyń biri Narhoz ýniversitetine alǵysymyz sheksiz», - dedi Ashat Aimaǵambetov.
Esdáýlet Dáýitbekovtiń ata-anasy alty bala tárbielep otyrǵanyn aita keteiik.
