QR Mádeniet jáne sport ministri Aqtoty Raiymqulova bilim berý uiymdaryn jańa oqý jylynyń bastalýyna daiyndaý boiynsha jumystyń qorytyndysyn shyǵarý jóninde keńes ótkizdi. Bul týraly atalǵan ministrliktiń baspasóz qyzmetinen málim etti, dep habarlaidy QazAqparat.
Vedomstvo málimetinshe, keńeste pedagogtar men qyzmetkerlerdiń, sondai-aq bilim alýshylardyń vaktsinalaý qarqynynyń monitoringisi boiynsha esep tyńdaldy. Osyǵan bailanysty bilim berý uiymdarynyń, mádeniet jáne sport mekemeleriniń barlyq basshylaryna sońǵy úsh ai ishinde turaqty meditsinalyq qarsy kórsetilimi bar jáne COVID-19-ben aýyryp jazylǵan qyzmetkerlerdi qospaǵanda, qyzmetkerler men kámeletke tolǵan stýdentterdi 100 paiyz vaktsinalaýdy qamtamasyz etý tapsyryldy.
Sondai-aq Aqtoty Raiymqulova joǵary bilikti mamandardy daiarlaýdyń mańyzdy máselesi – bilim berý mekemeleriniń materialdyq-tehnikalyq bazasy ekenin aitty. Búgingi tańda ministrliktiń qaraýyndaǵy barlyq derlik joǵary oqý oryndarynda, kolledjder men mektepterde jóndeý jumystary aiaqtaldy. Daiyndyq 100 paiyzdy quraidy.
«Qurmetti joǵary oqý oryndarynyń rektorlary, mektep, kolledj jáne mektep-internattarynyń direktorlary, sizder balalardyń bilim alýy úshin jáne tárbiesi úshin qaýipsiz ári qolaily jaǵdai jasaýlaryńyz kerek. Balalar men qyzmetkerlerdiń densaýlyǵyn qorǵaýdy qamtamasyz etýde sapaly jáne tiimdi jumystar atqarýǵa, sondai-aq oqý-tárbie protsesin sapaly uiymdastyrýǵa mindettisizder», – dedi Aqtoty Raiymqulova.
Sondai-aq biylǵy jyl elimizdiń tarihyndaǵy ataýly kúnderge toly. Olardyń qatarynda Qazaqstan Respýblikasy Táýelsizdiginiń 30 jyldyǵy, Jambyl Jabaevtyń 175 jyldyǵy, Qajymuqan Muńaitpasovtyń 150 jyldyǵy, Muqaǵali Maqataevtyń 90 jyldyǵy bar. Ministr Otanymyzdyń tarihi jetistikterin keńinen aqparattyq nasihattaýdy damytýdyń ýaqyty kelgenin tilge tiek etti.
Kezdesý sońynda departament basshysy ministrlikke baǵynysty uiymdardyń ókilderi qoiǵan suraqtarǵa jaýap berdi jáne jetekshilik etetin vitse-ministrlerge bekitilgen nysandardaǵy epidemiologiialyq qaýipsizdik máselelerin baqylaýda ustaýdy tapsyrdy.
