Bilim jáne ǵylym ministri Ashat Aimaǵambetov elordadaǵy №58 mektep-gimnaziiada shý shyǵarǵan antivakserler týraly pikir bildirdi, - dep habarlaidy Tengrinews.kz tilshisi.
Bilim jáne ǵylym ministrligi basshysynyń aitýynsha, mektepte ishki tártip buzylyp, sabaqtar toqtap qalý qaýpi tóngen. Ol bilim berý mekemesi der kezinde algoritm boiynsha shara qoldanbaǵanyn aitty.
"Jalpy, bul jaǵdai balalar qaýipsizdigine qater tóndirdi deýge bolady. Eń mańyzdy qundylyq - balalar qaýipsizdigi men ómiri. Mektep pen kez kelgen bilim berý uiymy tolyq qaýipsizdikti qamtamasyz etýi kerek. Bul mektepke shynaiy tekserý boldy, biraq reaktsiia múldem qanaǵattanarlyqsyz. Olar múldem basqa adamdar bolsa she? Onyń ústine bul zańbuzýshylyq birneshe kúnnen keiin belgili boldy. Iaǵni mektep der kezinde, tiisti shara qoldanbady, derekti jasyrdy, áreketsizdik tanytty deýge bolady", - dedi ministr apparat otyrysynda.
Elordalyq Bilim basqarmasy bastyǵynyń orynbasary mindetin atqarýshy Asyl Amangeldieva oqiǵa 5 qazanda bolǵanyn aitty. Onyń aitýynsha, sol kezde mektep direktory jinalysqa ketken eken.
"Osy kezde mektepke úsh áiel kelip, tártip saqshylarymen tóbelesken. Bastapqyda olar mektep direktorymen kezdesýge kelgenin aitty. Olar kúzetshi men dárigerlerge qol kóterdi. Mektep ákimshiligi olardy jalǵan aqparat taratqany jáne kúsh qoldanǵany úshin sotqa berdi", - dep túsindirdi ol.
Ministr Qazaqstandaǵy mektepterde tekseris júrgiziletinin málimdedi.
"Direktor basqa máselemen ainalysqan kezde mektepte kúzet bolmai ma sonda? Mundai sebepti aitýdyń qajeti joq. Bul qabyldanbaidy. Ekinshiden, osyndai jaǵdailar úshin kúzet mamandandyrylsyn dep arnaiy tapsyrma berdik.
Bul jaǵdai másele tolyq sheshilmegenin kórsetedi. Sondyqtan qarashanyń ekinshi jartysynda respýblika boiynsha qosymsha tekserý júrgiziledi. Ýaqyt berildi, sheshimi bar, qarajat bólindi - máseleni sheshýge múmkindik bar. Qaitalap aitamyn, eń basty mindet - balalar qaýipsizdigi", - dep túiindedi sózin Ashat Aimaǵambetov.
Eske salaiyq, 26 qazanda Aina Bakeeva men taǵy eki áiel Nur-Sultandaǵy №58 mektep-gimnaziiasyna kelip, shý shyǵarǵan. Olar "mektep ájethanasynda balaǵa ekpe salyndy"dep video túsirip, direktormen kezdesýdi suraǵan. Keiin bul aqparatqa qatysty astanalyq Bilim basqarmasynyń baspasóz qyzmeti ókilderi pikir bildirdi. Vedomstvo málimetinshe, №58 mektep-gimnaziiasyna úsh áiel kelgen.
