QR Ishki ister ministri qyzmettik boryshyn atqarý kezinde qaza bolǵandar politseilerdiń týystaryna memlekettik nagradalardy tapsyrdy, dep habarlaidy "Ult aqparat".
Qyzmettik boryshyn úlgili oryndaǵany, quqyq tártibin qamtamasyz etýge belsendi qatysqany úshin Almaty qalasy Politsiia departamenti patrýldik politsiia polki qyzmetiniń inspektory Jaras Janǵaziev qaitys bolǵannan keiin II dárejeli «Aibyn» ordenimen, Almaty qalasy Politsiia departamenti patrýldik politsiia polkiniń politseii Dastan Ábdiqanov qaitys bolǵannan keiin III dárejeli «Aibyn» ordenimen marapattaldy.
«Ishki ister ministrliginiń barlyq jeke quramy sizdiń qaiǵy-qasiretińizdi birge bólisedi. Balalar – ákelerinen, áielder – jubailarynan, ata-analar – ulynan aiyryldy. Biz úshin de bul orny tolmas qaza. Qyzmet barysynda qaza bolǵandardyń ekeýi de ózderin jaýapty jáne tártipti qyzmetker retinde kórsetti. Olar úshin qoǵamdyq tártip, qaýipsizdik jáne halyqty qorǵaý bárinen joǵary turdy. Eki aidan astam ýaqyt boiy olar kúsheitilgen rejimde jumys istedi. Politsiia mamandyǵyn tańdaǵan soń, búkil ómirin halyq pen Otanǵa qyzmet etýge arnady. Eń jaqsy qyzmetkerlerden aiyrylý óte aýyr jaǵdai. Jaras Janǵaziev pen Dastan Ábdiqanov óz boryshyn laiyqty ári adal oryndaǵan parasatty politseiler retinde áriptesteriniń esinde máńgi qalady», – dedi ministr Erlan Turǵymbaev.
Qaza tapqandardyń týystary Memleket Basshysy Qasym-Jomart Toqaevqa jáne IIM basshylyǵyna qoldaý kórsetkenderi úshin rizashylyqtaryn bildirdi.
Sondai-aq, ministr Almaty qalalyq Politsiia departamentinde keńes ótkizdi. Jinalys barysynda ol aýmaqtyq bólimsheniń basshylyǵyn qatań synǵa alyp, birqatar qyzmetkerge qatysty qabyldanǵan qatań sharalar týraly aityp ótti.
«Jeke qurammen aldyn alý jumystaryn júrgizýge baqylaýdy kúsheitý, teris áreket faktileriniń jolyn kesý jáne qyzmetkerlerdiń tártip buzýshylyqtaryna nemquraily qaraýǵa jol bermeý qajet», – dep atap ótti vedomstvo basshysy.
