Jalpyǵa birdei deklaratsiialaý júiesine kirý kezinde aktivter men mindettemeler týraly deklaratsiia bir ret usynylady. Bul týraly Memlekettik kirister komitetine silteme jasap QazAqparat habarlaidy.
Aktivter men mindettemeler týraly deklaratsiiany jeke tulǵa mynandai erekshe jaǵdailardy qaita usynady:
- sailanbaly nemese memlekettik laýazymǵa ne memlekettik nemese olarǵa teńestirilgen fýnktsiialardy oryndaýǵa bailanysty laýazymǵa kandidat;
- banktiń, saqtandyrý (qaita saqtandyrý) uiymynyń, investitsiialyq portfeldi basqarýshynyń iri qatysýshysy bolǵasy keletin tulǵalar;
- joǵaryda atalǵan adamdardyń jubailary.
«Sondai-aq, salyq zańnamasyna sáikes jeke tulǵa buryn usynǵan aktivter men mindettemeler týraly deklaratsiiasyna ózgerister jáne (nemese) tolyqtyrýlar engizilýi qajet bolsa, qosymsha deklaratsiiany tapsyrýyna bolady»,- dep tolyqtyrdy MKK-de.
2021 jylǵy 15 qyrkúiekte jalpyǵa birdei deklaratsiialaýdyń birinshi kezeńiniń aktivter men mindettemeler týraly deklaratsiiasyn tapsyrý merzimi aiaqtalǵan bolatyn.
Jeke tulǵalardyń deklaratsiialary boiynsha merzimdi uzartý quqyǵy salyq organyna merzimdi uzartý týraly habarlama jiberilmesten, merzimdi qyzmettegi áskeri qyzmetshilerge beriledi.
Jeke tulǵalardyń deklaratsiialaryn áskeri qyzmetshilerdiń usyný merzimi jergilikti áskeri basqarý organynan áskeri qyzmetti ótkerý ornyna ketýi týraly buiryq shyǵarylǵan kúnnen bastap merzimdi qyzmetti ótkerý ýaqyty kezeńine uzartylady.
