Búgin Astanada ótken baspasóz máslixatynda QR Aqparat jáne kommýnikatsiialar ministri Dáýren Abaev "Men qazaqpyn" atty xalyqaralyq megajobanyń bastalatynyn jariialady, dep xabarlaidy QazAqparat tilshisi.
Baiqaýdyń basty maqsaty - qazaq xalqynyń tól óneri, sonyń ishinde jyr-termeler men kúilerdi búgingi zaman talabyna sai jańartyp, óskeleń urpaqqa jetkizý. Ol úshin arnaiy top árbir oblysty aralap, jobaǵa qatysýshylardy irikteidi. Oq boiy ozyq shyqqandar televiziialyq baiqaýǵa joldama alady. Baiqaýǵa qatysýshylardyń jas ereksheligi - 18 ben 40 jas aralyǵy. Sondai-aq saxnaǵa shyǵatyn ónerpazdardyń kiimi qazaqy úlgide ári búgingi zaman talabyna sai bolýy tiis. Jobaǵa Qazaqstan azamattarynan bólek, Resei, Qytai men Mońǵoliia jerinde turatyn qandastarymyz da qatysa alady.
"Elbasy rýxani jańǵyrý jónindegi jalpyulttyq ideiany jariialaǵanda jańǵyrý úderisi mindetti túrde eldiń ulttyq rýxani tamyrynan nár alýy tiis ekenin atap ótken bolatyn. Bizdiń rýxani tamyrymyz - ata-babadan miras bolyp qalǵan saltymyz, tilimiz ben mýzykamyz, ádebietimiz desek, sonyń ishinde dástúrli ánshilik, kúishilik jáne termeshilik ónerdiń orny erekshe. Osy biregei ónerdi laiyqty dáripteý - eldik, birlik ideiasyn iske asyrýdyń asa utymdy quraly. Osyny eskere otyryp, biz, ministrlik pen "Qazaqstan"ulttyq arnasy "Men qazaqpyn" atty televiziialyq megajobany usynyp otyrmyz. Jobanyń maqsaty - dástúrli ánshi, termeshi men kúishilerimizdi, elimizdiń árbir aimaǵynda qalyptasqan óner mektebiniń ókilderin keńinen dáripteý, tańdaýly týyndylardy óskeleń urpaqqa zamanaýi formatta nasixattaý. Sondyqtan "Men qazaqpyn" jobasynyń túpki nátijesi rýxani murany urpaq kádesine jarata otyryp, ulttyq tutastyqty nyǵaitý bolýy tiis, iaǵni bul barsha xalqymyzdyń basyn qosyp, judyryqtai jumyldyratyn joba bolýy kerek. Mine, sol úshin biz jobaǵa tek elimizdiń ónerpazdaryn ǵana emes, jyraqtaǵy qandastyrymyzdy da qatystyrýdy kózdep otyrmyz", - deidi ministr Abaev.
"Qazaqstan" RTRK" AQ basqarma tóraǵasy Erlan Karinniń aitýynsha, baiqaýdyń alǵashqy irikteý týrlary 5 maýsymda Almaty oblysynda bastalady. Al shet elderdegi konkýrstar shilde aiynda uiymdastyrylmaq. Osydan keiin kórermen qaýym baiqaýdyń kúndeligi men negizgi konkýrsyn teledidardan kóre alady. Jeńimpazdar "Jyldyń eń úzdik dástúrli ánshisi", "Jyldyń eń úzdik termeshisi" jáne "Jyldyń eń úzdik kúishisi" atalymdary boiynsha marapattalady.
