QazVac vaktsinasyn ázirleýshi jáne Biologiialyq qaýipsizdik problemalary ǵylymi-zertteý institýtynyń bas direktory Kúnsulý Zakariia ál-Farabi atyndaǵy ǵylym men tehnika salasyndaǵy memlekettik syilyqtan keiin QazAqparat HAA tilshisine suhbat berip, qazaqstandyqtarǵa otandyq ǵylymdy qoldaǵany úshin alǵys aitty.
«Osyndai mártebeli ataq úshin joǵary jaýapkershilik sezimi de boidy kernep tur. Biologiialyq qaýipsizdik problemalary ǵylymi-zertteý institýtynyń 63 jyldyq tarihy bar. Osy aralyqta institýt ǵalymdary qaýipti jáne asa qaýipti infektsiialarǵa qarsy 70-ke jýyq vaktsina ázirledi. Bul – búkil ujymnyń eńbegi. Al búgin barlyq jyldardaǵy sol qajyrly eńbekti baǵalap otyr. Bul vaktsinalardyń barlyǵy óz ýaqytynda biologiialyq qaýipsizdikti qamtamasyz etý úshin úlken ekonomikalyq mańyzǵa ie boldy. Biz sońǵy eki jylda orasan zor jumys júrgizdik: alǵashqy qazaqstandyq QazVac vaktsinasyn ázirledik, synaqtan ótkizdik, meditsinalyq qoldanýǵa engizdik jáne biylǵy sáýir aiynan bastap shyǵardyq», - deidi K. Zakariia.
Onyń aitýynsha, Prezident Qasym-Jomart Toqaev ǵalymdardyń jumysyna árdaiym qoldaý kórsetip, ázirlemelerge erekshe qyzyǵýshylyq tanytyp otyrǵan.
«Memlekettik marapatty Memleket basshysy Qasym-Jomart Toqaevtyń qolynan alǵanymdy erekshe maqtanysh tutamyn. Prezident bastapqyda-aq bizdiń jumysymyzdy qoldady, jańa ázirlemelerge jan-jaqty qyzyǵýshylyq tanytty. Úkimet te kómek kórsetti. Kóptegen ministrlikter men vedomstvolar jáne is júzinde barlyq BAQ halyqty bizdiń zertteýimiz ben ázirlemelerimizdiń barysy týraly habardar etti, sol úshin olarǵa jeke rahmetimdi aitamyn», - dedi K. Zakariia.
Sonymen birge, otandyq vaktsinany ázirleýshi «QazAqparat» agenttiginiń ujymyna aqparattyq qoldaý kórsetkeni úshin alǵys aitty.
«QazAqparat» agenttigine jeke alǵysymdy bildirgim keledi, vaktsinany ázirleýdiń alǵashqy kúnderinen bastap, sizder aqparattyq salada qoldaý kórsettińizder. Halyqty aqparattandyrý boiynsha barlyq jumystardy júrgizip, vaktsinalaýdyń mańyzdylyǵyn túsindirdińizder, bul halyq arasynda osy kúrdeli aýrýdyń aldyn alý men joiý úshin óte qajet. Kóp raqmet. Barshańyzdy uly merekemiz – Táýelsizdik kúnimen quttyqtaimyn. Bul bizdiń ata-babalarymyz armandap ótken Táýelsizdik», - dedi Kúnsulý Zakariia.
Sóz sońynda ǵalym QazVac otandyq vaktsinasyn alǵashqylardyń biri bolyp synap kórgen eriktilerdiń úlesin erekshe atap ótti.
«Biik azamattyq ustanymyn kórsetip, alǵashqy qazaqstandyq vaktsinanyń klinikalyq zertteýlerine qatysqan 3 244 eriktige jeke alǵysymdy bildirgim keledi. Olar óz densaýlyǵyn táýekelge tikti. Qazir ekinshi vaktsinamyzdy synaqtan ótkizip jatyrmyz, oǵan Taraz qalasy men Jambyl oblysynan 300-ge jýyq adam qatysýda. Bul shyn máninde búgingi kúnniń erligi.
Biz ǵylym men tehnika salasyndaǵy stipendiattar atynan bul syilyqtyń birde-bir teńgesin almaýdy uiǵardyq. Biz bul somany Jambyl oblysynyń muqtaj turǵyndaryna páter alýǵa beremiz. Qaiyrymdylyq retinde biz muqtaj adamdarǵa, baspanasyz adamdarǵa kómekteskimiz keledi. Óitkeni otbasy úshin eń bastysy – óz úii», - deidi Kúnsulý Zakariia.
