Memlekettik saiasatta ǵylymi jáne sarapshylyq qoldaýǵa qajettilik artady. Bul týraly QR Parlamenti Senatynyń Tóraǵasy Máýlen Áshimbaev aitty, dep habarlaidy QazAqparat.
«Mańyzdy tus – áleýmettaný salasynda kadrlardy daiyndaý. Bul jerde de belgili bir máseleler bar. Tolyqtai alǵanda, aldaǵy kezeńde memlekettik saiasatta ǵylymi jáne sarapshylyq qoldaýǵa qajettilik artatyn bolady. Qazaqstan Parlamentiniń Senaty otandyq áleýmettaný ǵylymyna eń aldymen zańnamalyq qamtamasyz etý turǵysynan jan-jaqty qoldaý kórsetýge daiyn. Senat sarapshylyq qoǵamdastyqty damytýǵa baǵyttalǵan jobalardy qoldaidy. Kongress aiasynda Jas áleýmettanýshylar forýmy jumys isteitinin bilemiz. Bul bizdiń palatamyzda júrgizetin jumystarmen úndesedi», - dedi Senat spikeri Qazaqstan áleýmettanýshylarynyń VII kongresinde.
Osy rette Máýlen Áshimbaev Senat janynda Jas sarapshylar klýby alańy bar ekendigin eske saldy. Onyń maqsaty túrli salalardy damytý úshin zańnamany jetildirý men usynystar ázirleýge ssarapshylardyń jańa býynynyń áleýetin jumyldyrý ekendigin atap ótti.
«Buǵan qosa, biz klýb bastamashylyq jasaǵan jańa qoǵamdyq jobaǵa – Sarapshylar mektebine qoldaý kórsettik. Mekteptiń maqsaty – memlekettik qyzmette, akademiialyq ortada jumys isteitin jas mamandarǵa sarapshylyq daǵdy qalyptastyrýǵa kómektesý. Áleýmettanýshylar qaýymdastyǵyn osy jobada yntymaqtastyqqa shaqyramyn», - dedi ol.
