Memlekettik qyzmetshilerdiń jalaqysyn kem degende naqty 2 esege arttyrýǵa múmkindik bar. Bul týraly búgin QR Sybailas jemqorlyqqa qarsy is-qimyl agenttiginiń alqa májilisinde vedomstvo basshysy Alik Shpekbaev aitty, – dep habarlaidy QazAqparat.
«Azamattardyń ómir sapasy men kirisin arttyrýdyń mańyzdy faktorlarynyń biri jemqorlyqtan azat kásibi ári tiimdi memlekettik apparat qurý bolyp sanalady. Degenmen, memlekettik organdaǵy jumys ótili 20 jyldan asatyn, jalaqy tóleýdiń jańa júiesine ótpegen atqarýshy laýazymyndaǵy memlekettik qyzmetshiniń qazirgi jalaqysy eldegi ortasha kórsetkishten tómen. Memlekettik qyzmetterdi tsifrlandyrý, memlekettik organdar qyzmetiniń ashyqtyǵy men aiqyndyǵyn arttyrý, keshendi preventivti jazalaý sharalary boiynsha aýqymdy jumystarǵa qaramastan memlekettik qyzmetshiler jalaqysynyń qazirgi deńgeii jemqorlyqqa qarsy i-qimyl protsesin aitarlyqtai tejep otyr» dedi agenttik basshysy.
Ol Singapýr, Gonkong, Eýropa siiaqty sybailas jemqorlyq deńgeii tómen elderde jalaqy kólemin túbegeili arttyrý sybailas jemqorlyqty joiýdyń negizgi sharty bolǵanyn, memlekettik apparatqa joǵary bilikti kadrlardyń kelýin qamtamasyz etkenin mysalǵa keltirdi.
«Qazaqstannyń qazirgi shynaiy ómirine oralsam, sońǵy 5 jylda sybailas jemqorlyq úshin qylmystyq jaýapkershilikke tartylǵandardyń 75 paiyzy – bular jalaqysy tómennen orta jáne tómengi býyndaǵy memlekettik qyzmetkerler. Osy oraida basshylar parany ashkózdikten, al qarapaiym maman qajettilikten jáne tyǵyryqqa tirelgendikten alatyndyǵy týraly qoǵamdyq pikir barynsha ádil bolyp kórinedi» dedi A.Shpekbaev.
Osy oraida agenttik basshysy jalaqyny arttyrý biýdjetke qosymsha aýyrtpalyq túsirmeýi tiistigine basa nazar aýdardy.
«Memlekettik organdar men olardyń vedomstvolyq baǵynysty uiymdaryn keshendi ońtailandyrý qajet. Ol úshin quqyqtyq negiz qalyptasqan. Birinshi basshylar memlekettik organnyń shtattyq sany men uiymdyq qurylymyn derbes anyqtai alady. Al únemdelgen qarajat jalaqyny arttyrý úshin olardyń ieliginde qalady. Sondyqtan memlekettik qyzmetshilerdiń jalaqysyn kem degende naqty 2 esege arttyrýǵa múmkindik bar» dedi ol.
