Memlekettik hatshy Qyrymbek Kósherbaevtyń tóraǵalyǵymen ult ustazy Ahmet Baitursynulynyń 150 jyldyq mereitoiyna daiyndyq jáne ony ótkizý jónindegi memlekettik komissiianyń alǵashqy otyrysy ótti. QazAqparat bul týraly Aqordaǵa silteme jasap habarlaidy.
Otyrysta 2022 jyly toilanatyn mereitoidy halyqaralyq deńgeide, IýNESKO aiasynda atap ótý jáne daiyndyq is-sharalaryn uiymdastyrý máseleleri qaraldy.
Komissiia tóraǵasy Qyrymbek Kósherbaev Alash ardaqtysy, reformator ǵalymnyń eldi aǵartý jumystaryndaǵy róli, til men ádebiet ǵylymdarynyń negizin salýdaǵy zor eńbegine toqtaldy. Ahmet Baitursynuly ultymyzdyń uly tulǵalarynyń biri, halqymyzdyń beibit te berekeli ómir súrýi úshin aianbai eńbek etken, sol jolda basyn báigege tigip, «tar jol, taiǵaq keshýden» ótken tuǵyrly qairatker ekenin aitty. Sonymen qatar Alash balasynyń saýatyn ashyp, elimizdi órkenietti memleketterdiń qataryna qosýdy maqsat tutqanyn, «Jurt uqpasa, uqpasyn jabyqpaimyn. El – búginshil, Meniki – erteń úshin» degen Ahmet Baitursynuly bolashaq urpaq úshin qyzmet etkenin atap ótti.
«Ahmet Baitursynuly – ulttyq damýdyń talai jyl tot basyp qaraýsyz qalǵan tegershigin ainaldyryp, úzdiksiz qozǵalysqa qosyp bergen erteginiń erlerindei eren tulǵa. Týǵan halqynyń rýhani jańǵyrýyn tap ondai bilip, sol jolda qaltqysyz qyzmet etip, máńgi eskirmeitin mol mura qosqan qairatker qazaq dalasynda kemde kem», – dedi Qyrymbek Eleýuly.
Qazaqstan Respýblikasy Bilim jáne ǵylym ministrligi Ahmet Baitursynulynyń 150 jyldyq mereitoiyn daiyndaý jáne ótkizý jónindegi jalpyrespýblikalyq jospar jobasyn tanystyrdy. Atalǵan josparda Ahmet Baitursynulynyń qyzmetin jan-jaqty tanytýǵa baǵyttalǵan halyqaralyq, respýblikalyq jáne aimaqtyq is-sharalar qamtylǵan.
Otyrysta QR Bilim jáne ǵylym ministri Ashat Aimaǵambetov, Qostanai oblysynyń ákimi Arhimed Muhambetov, QR Syrtqy ister ministriniń birinshi orynbasary Shahrat Nuryshev, L.N. Gýmilev atyndaǵy Eýraziia ulttyq ýniversitetiniń rektory Erlan Sydyqov baiandama jasady.
Ult ustazynyń mereitoiyn atap ótý barysynda elimizdiń oqý oryndarynda ǵylymi-praktikalyq konferentsiialar, oqýlar t.b is-sharalar uiymdastyrylady. TÚRKSOI uiymy músheleriniń qatysýymen halyqaralyq Túrkologiialyq kongress ótkizý josparlanǵan. Alash qairatkeriniń shyǵarmashylyǵy boiynsha bilim berý oryndarynda ashyq sabaqtar, taqyryptyq konkýrstar ótkiziledi.
Sonymen qatar ult ustazynyń tańdamaly eńbekterin orys, aǵylshyn jáne túrik tilderine aýdarý, ǵylymi eńbekteriniń tolyq jinaǵynyń 12 tomdyǵyn baspadan shyǵarý, Ahmet Baitursynulynyń jáne «Alash» qozǵalysynyń basqa da qairatkerleriniń eńbekterin shetelderdiń arhivterinen izdestirip, ǵylymi ainalymǵa engizý boiynsha zertteý jumystary júrgiziledi.
Ahmet Baitursynulynyń ómiri týraly kórkem film túsirý, mýzei-úiine ǵylymi-restavratsiialyq jumystar júrgizý de josparǵa endi.
Uly tulǵanyń 150 jyldyq mereitoiyn IýNESKO aiasynda atap ótý máselesi aǵymdaǵy jylǵy qarasha aiynda ótetin atalǵan uiymnyń Bas konferentsiiasynda qaralý josparlanýda.
Komissiia otyrysynyń qorytyndysy boiynsha Qyrymbek Kósherbaev Ahmet Baitursynulynyń 150 jyldyq mereitoiyn joǵary uiymdastyrýshylyq deńgeide daiyndaý jáne ótkizý boiynsha memlekettik organdarǵa tiisti tapsyrmalar berdi.
