Memleket basshysy Qasym-Jomart Toqaev Astana kúnine orai qazaqstandyqtardy merekemen quttyqtap, elordanyń el damýyndaǵy airyqsha róline toqtaldy, dep habarlaidy ult.kz.
Prezidenttiń aitýynsha, Astana – egemen elimizdiń júregi, Táýelsiz Qazaqstannyń simvoly jáne jarqyn bolashaqqa umtylǵan ulttyń jasampaz kúsh-qýatynyń kórinisi. Memleket basshysy el taǵdyryna qatysty mańyzdy sheshimder dál osy qalada qabyldanatynyn atap ótti.
Qasym-Jomart Toqaevtyń sózinshe, bas qala aýqymdy tarihi ózgeristerdiń qozǵaýshy kúshine ainalyp, zamanaýi basqarý júieleri engizilgen «aqyldy qala» mártebesine ie boldy. Sonymen qatar elordada saiabaqtar, gúlzarlar men balalar alańdary salynyp, turǵyndar men qonaqtarǵa qolaily orta qalyptastyrylyp jatyr.
"Elorda kúni qarsańynda ult jylnamasyndaǵy túbegeili betburys kezeńine jol ashqan Halyq Konstitýtsiiasy zańdy kúshine endi. Munyń simvoldyq máni bar. Shyn máninde, osy tarihi oqiǵa bilik pen qoǵamnyń negizgi institýttaryn jańǵyrtý isiniń bastaýy sanalady", - dedi Qasym-Jomart Toqaev.
Memleket basshysy elordanyń mártebesi týraly jańa konstitýtsiialyq zań Astananyń saiasi, ákimshilik, ekonomikalyq jáne mádeni ortalyq retindegi rólin kúsheitkenin aitty. Sondai-aq qalanyń halyqaralyq bedeli artyp kele jatqanyn, óńirlik jáne jahandyq deńgeidegi mańyzdy máseleler boiynsha sheshimderdiń Astanada qabyldanýy sonyń dáleli ekenin jetkizdi.
Quttyqtaý sońynda Prezident elordanyń «Zań men Tártip», «Taza Qazaqstan» qaǵidattaryna negizdelgen jańa qoǵamdyq mádeniettiń úlgisine ainalýy tiis ekenin atap ótip, Astana turǵyndaryna amandyq pen tabys tiledi.
