Foto: Aqorda
Aqorda rezidentsiiasynda HHV Qysqy Olimpiada oiyndarynyń jeńimpazy Mihail Shaidorov pen onyń jattyqtyrýshylaryn marapattaý rásimi ótti, dep habarlaidy Ult.kz.
Prezident Qasym-Jomart Toqaev saltanatty is-sharada sóilegen sózinde Qazaqstan úshin bul Olimpiadanyń orny erekshe ekenin aitty.
– Otandasymyz Mihail Shaidorov tamasha óner kórsetti. Mánerlep syrǵanaýdan altyn medalǵa ie bolyp, kók Týymyzdy Olimp shyńyna kóterdi. Sondyqtan Mihailǵa alǵysymdy bildirip, qutty bolsyn degim keledi. Aqordada jinalyp otyrǵan adamdarǵa, eń aldymen, Mihaildyń ákesi men jeńimpazdyń bapkerine rizashylyǵymdy aitamyn. Barshańyzdy taǵy da shyn júrekten quttyqtaimyn! Sizder qajyrly jáne tabandy eńbektiń arqasynda Mihaildy myqty sportshy, naǵyz daryn iesi retinde búkil álemge pash ettińizder. Halqymyz Mihaildy maqtan tutady, al jas býyn odan úlgi alady. Olimpiada jeńimpazy bolý – biik maqsat jolynda kez kelgen qiyndyqty jeńý, iaǵni, uzaq ári kúrdeli jolǵa daiyn bolý degen sóz. Temirdei tártippen kún saiyn tynymsyz jumys istegen adam ǵana zor tabysqa jeteri anyq, – dedi Memleket basshysy.
Foto: Aqorda
Qasym-Jomart Toqaev Mihail Shaidorovtyń jeńisi elimiz úshin teńdesi joq jetistik sanalatynyna nazar aýdardy.
– Birinshiden, bul – kópten kútken, iaǵni, 32 jyldan keiin qol jetkizgen tarihi júlde. Ekinshiden, bul – mánerlep syrǵanaýdan el qorjynyna túsken alǵashqy Olimpiada altyny. Úshinshiden, kúlli álem elimizde áigili sportshy Denis Tenniń jolyn jalǵastyratyn daryndy jastardyń bar ekenine kýá boldy. Mihail Shaidorovtyń Olimpiadada kórsetken keremet óneri, sózsiz, tarihi jetistik, naǵyz triýmf. Kortina d’Ampetstso muz aidynynda otandasymyzdyń juldyzy jarqyrady. Bul – Olimpiada chempionynyń ózin-ózi shyńdap, óz kúshine sengeniniń, mánerlep syrǵanaý siiaqty asa qiyn sport túrine degen erekshe mahabbatynyń jemisi, – dedi Prezident.
Prezident Olimpiada chempionynyń ákesi ári alǵashqy bapkeri Stanislav Shaidorovtyń eńbegine airyqsha toqtaldy.
– Stanislav Aleksandrovich – mánerlep syrǵanaýdan Qazaqstannyń birneshe dúrkin chempiony. Ákesi, tuńǵysh bapkeri retinde Mihaildyń muz aidynyndaǵy alǵashqy qadamyn jasaýǵa kómektesip, ómirdiń eń qiyn sátterinde árdaiym ulynyń janynda bolǵan adam. Memleket basshysy retinde Qazaqstan Respýblikasynyń kók Týyn álemniń basty sport arenasynda biik jelbiretken osyndai uldy, otanshyl azamatty tárbielegenińiz úshin Sizge shyn júrekten alǵys aitamyn. Baspasóz betindegi suhbatyńyzdy oqyp shyqtym. Mihaildan meiirimińizdi aiamai, talantty perzentińizdiń sporttaǵy erekshe missiiasyna tittei de kúmán keltirmei, ákelik paryzyńyzdy adal ári laiyqty atqardyńyz. Biik shyńǵa aparar buralań joldan birge óttińizder. Endi sol taban aqy, mańdai terdiń jemisin kórip, qurmet pen qoshemetke bólenip jatsyzdar. Búginde halqymyz Sizderdi ardaq tutady. Otanshyldyqtyń naǵyz úlgisin kórsetkenderińiz úshin elimiz Sizderge rizashylyǵyn bildiredi. Jurtshylyqtyń alǵaýsyz alǵysy men qurmetine men de qosylamyn, – dedi Qasym-Jomart Toqaev.
Foto: Aqorda
Qasym-Jomart Toqaev chempionnyń bapkeri, áigili sportshy, 1994 jylǵy Olimpiada jeńimpazy, álem chempiony Aleksei Ýrmanovqa ystyq yqylasyn bildirdi.
– Mánerlep syrǵanaý sportyndaǵy bilikti maman retinde eren jetistikterińizdi jalǵaityn laiyqty izbasar daiyndadyńyz. Sol úshin Sizge zor alǵys aitamyn. Osynaý tamasha tabysqa salalyq ministrlik, federatsiia, sondai-aq ataqty boksshymyz, jaqynda esimi Dúniejúzilik boks dańqy zalyna jazylǵan Gennadii Golovkin basqaratyn Ulttyq Olimpiada komiteti eleýli úles qosty. Otandastarymyz sporttyq básekeniń qiyndyqtaryn, ásirese, erkin baǵdarlamadan keiingi Mihaildyń kúrdeli jaǵdaiyn tebirenispen baqylap otyrdy. Biraq ol táýekelge baryp, jer-jahannyń basty bairaqty básekesindegi jeńisti julyp aldy. Bul da kezdeisoq emes. Ózine berilgen jalǵyz múmkindikti ekiniń biri sátti paidalana almaidy. Ádette jarysqa túskende «baq shaba ma, bap shaba ma» dep jatady. Biraq «eńbek – bárin de jeńbek» degen ulaǵatty da umytpaiyq. Mihaildyń jeńisi myńdaǵan jastarymyzdy sportpen shuǵyldanýǵa jigerlendirdi. Eńbek etseń, erik-jigeriń muqalmai, batyl áreket qylsań, kez kelgen, tipti qol jetpestei kórinetin armannyń ózi oryndalatynyna senimin kúsheitti. Búginde elimizdegi myńdaǵan ul-qyz Mihail Shaidorovqa qyzyǵa qarap, elikteidi, dańqty sportshy bolǵysy keledi. Demek elimizdiń ulandary álemdik sporttyń biiginde jarqyrai kórinetin kún alda. Barsha Olimpiada chempiondarynyń aty álem sportynyń jylnamasyna jazylady, olardyń jetistikteri Lozannadaǵy Halyqaralyq Olimpiada komitetiniń mýzeiinde tirkeledi. Endi túrli eldiń týristeri Mihail Shaidorovtyń 2026 jylǵy Olimpiadadaǵy tamasha jeńisi týraly biletin bolady, – dedi Memleket basshysy.
Qasym-Jomart Toqaev memleket tarapynan buqaralyq jáne kásibi sporttyń damýyna qolaily jaǵdai jasalatynyn aitty. Bul – memlekettik saiasattyń basym baǵyty.
– Olimpiadadaǵy nátije árqashan el damýynyń mańyzdy kórsetkishteriniń biri sanalǵan, aldaǵy ýaqytta da solai bola bermek. Qazaqstan osy jarystarǵa qatysqan sportshylardyń sany jaǵynan 25-orynǵa taban tiredi. Biz aldyna maqsat qoiǵan ár eńbekqor jan óziniń qabilet-qarymyn kórsete alatyn, sonyń ishinde sportta kózdegen biigine jetýi úshin mol múmkindikke jol ashatyn Ádiletti Qazaqstandy quryp jatyrmyz. Adal báseke, meritokratiia, tártip pen jaýapkershilik, bul – úlken sporttyń da, kez kelgen qýatty memlekettiń de dińgegi. Ulttyń jasampazdyq qýatyn arttyrý respýblikalyq referendýmǵa shyǵarylǵan jańa halyqtyq Konstitýtsiia jobasynyń negizgi mazmundyq ózegi bolyp otyr. Ata Zańdaǵy ádildik, tártipke baǵyný, tabiǵatty aialaý, otanshyldyq qaǵidattary memleket irgesin bekemdep, órkendeýdiń qozǵaýshy kúshine ainalady, – dedi Memleket basshysy.
Prezidenttiń pikirinshe, memleketterdiń damýy da úlken sportqa uqsas: kim aldyna biik maqsat qoiady, tabandy eńbek etedi, birlesip jumys isteidi, sol jetistikke jetedi.
– Búgin biz jeńiske jetýge bar kúsh-jigerin jumsap, jeke rekordtaryn jańartqan Mihail men ulttyq qurama múshelerin quttyqtaimyz. Keibir sportshylarymyz osyndai aýqymdaǵy jarysqa alǵash ret qatyssa da, olar laiyqty óner kórsetti. Kóptegen sportshymyz ózderi synǵa túsken saiysta úzdik ondyqqa endi. Bul bolashaqtaǵy tabystarǵa jol ashady. Azamattarymyzdyń halyqaralyq deńgeidegi jetistikteri, meili, ol sportta nemese oqýshylar men stýdentter olimpiadasynda, ónerde, tipti basqa salalarda bolsyn, elimizdiń órkendep kele jatqanyn kórsetedi. Taiaýda Milan men Kortinada Qysqy Paralimpiada oiyndary bastalady. Sportshylarymyzǵa sáttilik tileimin, – dedi Qasym-Jomart Toqaev.
Memleket basshysy sózin qorytyndylai kele, eki jyldan keiin atletterimiz Los-Andjeleste ótetin Jazǵy Olimpiada oiyndaryna qatysatynyn eske saldy.
– Týrizm jáne sport ministrligi, Ulttyq Olimpiada komiteti, federatsiialar birlese jumys atqaryp, qurama múshelerin jan-jaqty qoldaýǵa tiis. 2029 jyly Almaty qalasynda ótetin Qysqy Aziia oiyndaryna erekshe nazar aýdarý qajet. Oiyndar eń joǵary deńgeide uiymdastyrylýy kerek. Bul – Qazaqstandaǵy sporttyń damýyna tyń serpin berip, ekonomika men týrizm salalaryna oń yqpal etetin óte mańyzdy is-shara, – dedi Qasym-Jomart Toqaev.
Foto: Aqorda
Prezident XXV Qysqy Olimpiada oiyndaryndaǵy jetistikteri úshin Mihail Shaidorovty II dárejeli «Barys» ordenimen, bapkeri, jattyqtyrýshy-keńesshi Aleksei Ýrmanovty II dárejeli «Dostyq» ordenimen marapattady.
«Qurmet» ordeni Qazaqstan Respýblikasynyń mánerlep syrǵanaýdan ulttyq qurama komandasynyń bas jattyqtyrýshysy Ásem Qasanovaǵa, mánerlep syrǵanaýdan jattyqtyrýshy Stanislav Shaidorovqa, Qazaqstandyq konkimen mánerlep syrǵanaý odaǵynyń prezidenti Baýyrjan Eralyǵa tabystaldy.
Olimpiada chempiony Mihail Shaidorov kórsetken qoldaýy úshin Qasym-Jomart Toqaevqa jáne barsha otandasymyzǵa rizashylyǵyn bildirdi.
– Qurmetti Qasym-Jomart Kemeluly! Bul kezdesýge Olimpiada chempiony retinde qatysý – men úshin zor mártebe. Altyn medal – meniń ǵana emes, ata-anamnyń, bapkerlerimniń jáne men úshin alańdap, qoldaý kórsetken barsha qazaqstandyqtyń jeńisi. Bul aianbai ter tógip jumys isteseń, jaqyn jandardyń mahabbaty men senimi bolsa, armandardyń oryndalatynyn kórsetedi. Prezident myrza, Sizdiń qoldaýyńyzdyń arqasynda sportshylar úlken jetistikterge, jańa tarihi rekordtarǵa qol jetkizip júr. Men Olimpiada altynymen shektelmeimin. Aldymda uzaq jol bar. Elimniń senimin aqtap, jas urpaqqa úlgi bolyp, halqymyzdyń mereiin ústem etkim keledi. Rahmet Sizge! Súiikti Otanyma, Qazaqstanyma qyzmet etemin, – dedi Mihail Shaidorov.
