Prezident Qasym-Jomart Toqaev belgili jazýshy, qoǵam qairatkeri Sultan Orazalinniń qazasyna bailanysty marqumnyń otbasy men jaqyn týystaryna kóńil aitty. Memleket basshysynyń kóńil aitý jedelhatyn baspasóz hatshysy Berik Ýáli jariialady.
"Belgili jazýshy, Qazaqstannyń eńbek sińirgen qairatkeri, Qazaq televiziiasynyń qurmetti ardageri, halyqaralyq televiziia jáne radio akademiiasynyń akademigi Sultan Orazalinniń dúnieden ótýine bailanysty kóńil aitamyn. Sultan Sháripuly otandyq telearnada jemisti jumys istep, ulttyq qundylyqtardyń qaita jańǵyryp, kógildir ekranda nasihattalýyna mol úles qosty. Saiasi-ákimshilik qyzmetti de abyroily atqardy. Avtorlyq quqyq, memlekettik tildiń mártebesin arttyrý, ulttyq saiasat, terminologiia men onomastika máselelerin kóterip, kókeikesti oilary men utymdy bastamalaryn qoǵam nazaryna usyndy. Qarymdy qalamger retinde shyǵarmashylyq jolda da tabysty eńbek etti. Marqumnyń imany salamat, jany jánnatta bolsyn", - dep jazylǵan Prezidenttiń jedelhatynda.
Sondai-aq prezident ónegeli ǵumyr keship, sońyna ádebi mol mura qaldyrǵan Sultan Sháripulynyń jarqyn beinesi umytylmaitynyn aitty.
Eske sala keteiik, 22 tamyzda Sultan Orazalin 80 jasynda ómirden ótti.
Orazalin 1941 jyly Shyǵys Qazaqstan oblysynyń Aiagóz qalasynda týǵan. Ol – Qazaqstandaǵy kórkem televiziianyń negizin salýshylardyń biri. Qazaq televiziiasynyń ádebidramalyq baǵdarlamalar bas redaktsiiasyn tuńǵysh ret uiymdastyryp, 15 jyldan astam basqardy.
Olardyń ishinde "Suhbat", "Qymyzhana", "Kezdesý", "Shuǵyla", "Aitys", "Halyq qazynasy" habarlar tsikly men "Kek", "Otyrar oirany", "Ólim fabrikasy", "Qashqyn" teleqoiylymdary halyqqa keńinen tanyldy.
"Aitys" habaryn tuńǵysh ret uiymdastyryp, kóp jyldyq baǵdarlamasyn jasady, alǵashqy habardy ózi júrgizdi.
