Foto: Aqorda
Kezdesý barysynda Prezident Qasym-Jomart Toqaev beitarap mandat negizinde áreket etetin Halyqaralyq Qyzyl krest komitetiniń biregei sipatyna toqtalyp, gýmanitarlyq kómekti saiasilandyrýǵa bolmaitynyn atap ótti, dep habarlaidy Ult.kz.
– Halyqaralyq Qyzyl krest komiteti dúnie júzindegi gýmanitarlyq yntymaqtastyq júiesinde asa mańyzdy ról atqarady. Halyqaralyq quqyq normalaryn nyǵaitýǵa qosqan úlesińizdi joǵary baǵalaimyz. Siz basqaratyn Uiym men basqa da halyqaralyq bedeldi qurylymdar barshaǵa ortaq adamzat qundylyqtaryn nasihattaýǵa eleýli úles qosyp keledi. Ásirese, bul is adamdar kómekke muqtaj aimaqtarda óte mańyzdy, – dedi Prezident.
Qazaqstan Halyqaralyq gýmanitarlyq quqyqqa saiasi beiildilikti kúsheitý jónindegi jahandyq bastama kótergen alty memlekettiń biri sanalady.
Bul rette soǵys kezindegi adamgershilik taqyryby boiynsha jyl sońyna qarai Iordaniiada ótetin joǵary deńgeidegi Konferentsiiaǵa daiyndyq máseleleri pysyqtaldy.
Miriana Spoliarich Halyqaralyq Qyzyl krest komitetiniń qyzmetine qoldaý kórsetkeni úshin Qazaqstan tarapyna rizashylyǵyn bildirdi. Onyń aitýynsha, toqsanynshy jyldardan beri elimiz ben Uiym arasynda qalyptasqan syndarly dialog dáiekti túrde damyp keledi.
– Memleketterdiń qoldaýy óte mańyzdy. Siz muny oryndy atap óttińiz. Jeneva konventsiiasyna barsha el qatysady. Alaida bul qujattyń yqpaly atalǵan normalardy memleketterdiń qanshalyqty qorǵap, qoldaýǵa ázirligine bailanysty, – dedi HQKK basshysy.
Qasym-Jomart Toqaev pen Miriana Spoliarich halyqaralyq jáne gýmanitarlyq kún tártibindegi ózekti máselelerdi talqylap, Qazaqstan men Uiym arasyndaǵy seriktestikti odan ári nyǵaitýǵa múddeli ekenderin rastady.
