Foto: Aqorda
Memleket basshysy Qasym-Jomart Toqaev qazaqstandyqtardy Alǵys aitý kúnimen quttyqtap, bul merekeniń halqymyzdyń eń asyl qundylyqtaryn dáripteitin erekshe kún ekenin atap ótti, dep habarlaidy Ult.kz.
Prezidenttiń aitýynsha, ózara qurmet, janashyrlyq jáne shynaiy tileýlestik – ult bolmysyna tán qasietter. Alǵys aitý dástúri el ishindegi senim men birlikti nyǵaityp, rýhani tutastyqty arttyrýǵa qyzmet etip keledi. Qazirgi qubylmaly kezeńde bul qundylyqtardyń mańyzy airyqsha.
Memleket basshysy eń aldymen eldi qiyn-qystaý zamandarda saqtap, urpaqqa baǵa jetpes mura qaldyrǵan ata-babalarǵa taǵzym etti. Sondai-aq ustazdar, dárigerler, mádeniet qyzmetkerleri, kásipkerler, jumysshylar, quqyq qorǵaý organdarynyń ókilderi, órt sóndirýshiler men qutqarýshylarǵa jáne adal eńbegimen el damýyna úles qosyp júrgen barlyq azamattarǵa alǵys bildirdi.
Prezident jastar men eriktilerge erekshe rizashylyǵyn jetkizdi. Onyń sózinshe, qoǵam igiligi úshin aianbai eńbek etip, muqtaj jandarǵa qol ushyn sozyp júrgen belsendi azamattardyń eńbegi – jasampaz ári jaýapty otanshyldyqtyń aiqyn kórinisi.
Qasym-Jomart Toqaev elimizdiń tarihi betburys kezeńine qadam basqanyn atap ótti. Referendýmǵa usynylǵan jańa Konstitýtsiia jobasy adam quqyqtaryn qorǵaý tetikterin jetildirýge, memlekettik institýttardyń jaýapkershiligin arttyrýǵa jáne Táýelsizdik pen Egemendikti nyǵaitýǵa baǵyttalǵanyn aitty.
Memleket basshysy aldaǵy ózgeristerdiń tabysty júzege asýy halyqtyń birligine, parasattylyǵyna jáne sanaly azamattyq ustanymyna bailanysty ekenin jetkizdi. Onyń pikirinshe, Zań men Tártip qaǵidalaryn berik ustanyp, yntymaq pen tatýlyqty saqtai bilsek, Qýatty ári Ádiletti Qazaqstandy birge qurýǵa bolady.
Prezident barsha qazaqstandyqtarǵa amandyq pen tabys tiledi.
