Memleket basshysy Qasym-Jomart Toqaev kórnekti ǵalym Nádir Nádirovtiń otbasy men jaqyn týystaryna kóńil aitty. Bul týraly Prezidenttiń baspasóz hatshysy Berik Ýáli málimdedi, - dep habarlaidy Tengrinews.kz.
"Kórnekti ǵalym, QR UǴA akademigi, qoǵam qairatkeri Nádir Nádirovtiń dúnieden ótýine bailanysty kóńil aitamyn.
Nádir Nádirov otandyq munai himiiasynyń negizin qalaýshylardyń biri bolyp, Qazaqstannyń ǵylymi-ekonomikalyq áleýetin arttyrý jolynda eńbek etti. Qoǵamdyq jumystarda da belsendi bolyp, elimizdegi ultaralyq kelisim men tatýlyqty nyǵaitýǵa zor úles qosty.
Nádir Kárimulynyń jarqyn beinesi umytylmai, esimi otandyq ǵylym tarihyna altyn áriptermen jazylady", - delingen Prezidenttiń jedelhatynda.
