Elimizdiń orta bilim berý oryndarynda evakýatsiia jolyn (syrtqa shyǵý esigi) jabýǵa qatań tyiym salyndy. Bul týraly QR TJM órtke qarsy qyzmet komiteti basqarmasynyń basshysy Erlan Tóregeldiev málim etti, dep habarlaidy QazAqparat.
«Órt qaýipsizdigi talaptaryna sáikes barlyq evakýatsiialaý joldary erkin jáne ǵimarattan shyǵý baǵyty boiynsha ashyq turýy tiis. Ásirese bilim berý mekemesi kólemine qaramastan qaýiptiń joǵary dárejeli túrine jatady, sondyqtan da olarǵa jyl saiyn birneshe ret tekserý ótkizemiz. Biyl da oqý jyly bastalǵanǵa deiin elimizdegi barlyq bilim berý nysandary tekserildi. Qaýipsizdik erejesi saqtalmaǵan bilim mekemelerine eskertý jasalyp, nusqama berildi», - dedi Tóregeldiev OKQ-de ótken baspasóz máslihatynda.
Sondai-aq, TJM ókili ǵimarattaǵy qaýipsizdik erejesi saqtalmaǵan jaǵdaida jaýapkershiliktiń baryn eske saldy.
«Taǵy qaitalaimyz eshqandai jaǵdaida evakýatsiialaýǵa arnalǵan esikterdi jabýǵa bolmaidy. Óitkeni mektepte bala kóp, sondyqtan evakýatsiia joly tolyqtai jumys istep turýy tiis. Esikti jabýǵa nemese ýaqytsha buǵattaýǵa qatań tyiym salynady», - deidi ol.
