Foto: Pexels.com
2025 jyldan bastap barlyq óńirdegi balabaqshalarda vaýcherlik qarjylandyrý engizý josparlanyp otyr. Bul týraly Májilis depýtattarynyń saýalyna jaýap retinde Premer-ministrdiń orynbasary Tamara Dúisenova málimdedi, dep habarlaidy Ult.kz.
Vitse-premerdiń aitýynsha, mektepke deiingi bilimniń qoljetimdiligin arttyrý maqsatynda balabaqshalarda vaýcherlik qarjylandyrý boiynsha pilottyq joba iske qosylǵan. Bul joba aiasynda:
- - ata-analar balabaqshany ózderi tańdai alady;
- - menshik túrine qaramastan barlyq mektepke deiingi uiymdar zańda kórsetilgen talaptarǵa sai bolǵan jaǵdaida memlekettik tapsyrysqa ótinish berýge quqyly;
- - qarjylandyrý balanyń balabaqshaǵa naqty kelýine qarai bólinedi («balanyń sońynan aqsha» qaǵidaty);
- - bul ádis sybailas jemqorlyq táýekelderin azaitady.
«Taraz qalasynda júzege asqan jobanyń nátijesinde 2 aidyń ishinde (tamyz-qyrkúiek) 600 mln teńge únemdelip, balabaqshaǵa kelmeitin balalar alynyp tastaldy. Eń mańyzdysy, birneshe jyl boiy kezekte turǵan 2 jastan asqan 17 myńnan astam balaǵa oryn tabyldy. Qazirgi ýaqytta pilottyq joba Shymkent qalasy men Túrkistan oblysynda jalǵasýda, al kelesi jyldan bastap ony barlyq óńirde kezeń-kezeńimen engizý kózdelip otyr. Pilotty júzege asyrý kezinde mektepke deiingi uiymdardyń jabylý jaǵdaiy tirkelmedi, tek bala kelmeýine nemese jalǵan málimetterge bailanysty qarjylandyrý kólemi tómendedi», – dedi Tamara Dúisenova.
Onyń sózinshe, 2024 jyldyń 13 tamyzynda «Atameken» UKP sheńberinde mektepke deiingi uiymdarǵa vaýcherlik júieni engizý talqylandy. Bul kezdesýge jekemenshik balabaqshalardyń quryltaishylary, qaýymdastyqtar jáne óńirlik kásipkerler palatalary qatysty.
«Joba qatysýshylary pilottyq jobany qoldady jáne vaýcherlik qarjylandyrýǵa kóshý mektepke deiingi tárbie men oqytýǵa memlekettik tapsyrystyń ashyqtyǵyn qamtamasyz etetinine kelisti. Osyǵan bailanysty vaýcherlik qarjylandyrý pilottyq jobasynyń iske asyrylýy jalǵasady», – dep tolyqtyrdy vitse-premer.
