Bilim jáne ǵylym ministri Ashat Aimaǵambetov jańa oqý jylynda balalardyń mektepke qandai kiimmen bara alatynyn aitty, dep habarlaidy "Ult aqparat".
«Jańa oqý jylynyń bastalýy qarsańynda mektep formasy týraly másele ózekti bolady. Pandemiiaǵa deiin mektep formasyn kiiý mindetti boldy. Biraq ótken jyly barlyq jaǵdailardy eskere otyryp, biz oqýshylarǵa mektepke tek mektep formasynda ǵana emes, sonymen qatar klassikalyq stildegi kiimde de kelýge múmkindik beretin sheshim qabyldadyq.
Mektep formasy aldaǵy oqý jylynda mindetti bola ma? Men ózim ata-ana retinde de, Bilim jáne ǵylym ministri retinde de mektep formasyn kiiýdi qoldaimyn.
Conymen qatar, pedagogter mektep formasy balalardy bir tártippen tárbieleýge úles qosatynyn, sol mektepke baratyn balalarmen birlikti sezinýge múmkindik beretinin jáne eń bastysy, oqýshylar arasyndaǵy áleýmettik aiyrmashylyqty azaitýǵa kómektesetinin aitady.
Ata-analardyń, muǵalimderdiń, mektep ákimshilikteriniń, bilim basqarmasy basshylarynyń pikirlerin tyńdap, kóbisi mektep formasyn jaqtaidy degen qorytyndyǵa keldim.
Biraq mektep formasyn qoldaǵandar men qarsylyq bildirgenderdiń pikirlerin saralap, barlyq jaǵdailardy eskere otyryp, biz oqýshylarǵa mektepke tek mektep formasynda ǵana emes, sonymen qatar klassikalyq stildegi kiimde de kelýge múmkindik beretin sheshimdi qabyldadyq» dep jazdy ministr Facebook paraqshasynda.
Onyń aitýynsha, bul sheshim tek qana kelesi oqý jyly úshin qabyldandy.
«Mektep formasyn óndirýshilerdiń bul týraly basqa pikirde ekenin bilemin. Osyǵan bailanysty keibir ata-analar men mektep formasyn óndirýshilerdiń pikirleri ártúrli bolatynyn bilemin. Bul sheshimdi qabyldaǵan kezde neni basshylyqqa alǵanymyzdy túsindireiin.
Birinshiden, epidemiologiialyq jaǵdaidy eskerdik. Qazir elimizdiń kóptegen aimaqtarynda karantindik shekteý sharalary kúsheigen. Dúkender belgili bir ýaqytta, keibir qalalarda jumys kúnderi ǵana isteidi. Eger ata-analar balalarǵa mektep formasyn satyp alý úshin saýda ortalyqtary men dúkenderge jappai baratyn bolsa, onda uzyn-sonar kezek bolyp, Covid-19 juqtyrý qaýpin týdyrýy múmkin ekenin bilemiz.
Ekinshiden, keibir otbasylardaǵy ýaqytsha ekonomikalyq qiyndyqtarǵa bailanysty mektep formasyn satyp alý otbasylyq biýdjetke qosymsha júkteme bolýy múmkin. Sondyqtan, eger ata-analar túrli jaǵdailarǵa bailanysty balaǵa mektep formasyn ala almasa, onda ýaqytsha, kelesi oqý jylyna deiin mektepke klassikalyq stildegi kiimmen barýǵa bolady.
Qorytyndylai kele, mektep formasyna qatysty qandai sheshim qabyldansa da, osy másele tóńireginde pikirler ártúrli bolatynyn túsinemin. Mektep formasyn jaqtaýshylar da, qarsy bolǵandar da óz pikirlerin aitatyny belgili.
Biraq bul máselede biz úshin qalyptasqan jaǵdaidy obektivti baǵalaý jáne yqtimal táýekelderdi qarastyrý mańyzdy boldy» dep túiindedi sózin Bilim jáne ǵylym ministri.
