Koronavirýs infektsiiasymen kúresip jatqan meditsinalyq qyzmetkerlerge birjolǵy áleýmettik tólem berý týraly buiryqqa engizilgen ózgeristerge sáikes áleýmettik tólem alý úshin kerekti qujattar tizimi jariialandy, dep habarlaidy "Ult aqparat".
«Meditsinalyq qyzmetker COVID-19 koronavirýstyq infektsiiasyn juqtyrýdan, virýstyq pnevmoniiamen syrqattanýdan qaitys bolǵan jaǵdaida komissiia úsh jumys kúninen keshiktirmei onyń otbasy múshelerine zańnamada belgilengen tártippen berilgen qaitys bolý týraly kýáliktiń kóshirmesin qosa bere otyryp ótinish usyný qajettiligin habarlaidy. Qyzmetker qaitys bolǵan jaǵdaida birjolǵy áleýmettik tólem alýǵa ótinishti onyń otbasy músheleriniń biri densaýlyq saqtaýdy memlekettik basqarýdyń jergilikti organyna beredi», - delingen qujatta.
Komissiia qaitys bolý týraly kýálikti alǵannan keiin COVID-19 koronavirýstyq infektsiiasyn juqtyrýdan, virýstyq pnevmoniiamen syrqattanýdan qaitys bolǵan densaýlyq saqtaý uiymdary qyzmetkerleriniń otbasy músheleriniń tizimin qalyptastyrady.
Qalyptastyrylǵan otbasylarǵa beriletin birjolǵy áleýmettik tólem alýǵa adamdar tizimin oblystyń, respýblikalyq mańyzy bar qalanyń jáne astananyń densaýlyq saqtaýdy memlekettik basqarýdyń jergilikti organdary nemese TQSQBK Memlekettik korporatsiianyń bólimshesine jiberedi.
Otbasylarǵa beriletin birjolǵy áleýmettik tólem alý úshin myna qujattar kerek:
- qyzmetker qaitys bolǵan jaǵdaida birjolǵy áleýmettik tólem alýǵa ótinish;
- qaitys bolǵany týraly kýáliktiń kóshirmesi;
- № 415 buiryqpen bekitilgen IAOET kartasy (COVID-19 koronavirýstyq infektsiiasyn juqtyrǵan qyzmetkerler boiynsha);
- № 907 buiryqpen bekitilgen nysan boiynsha meditsinalyq karta (virýstyq pnevmoniiamen syrqattanǵan qyzmetkerler boiynsha) qosa beriledi.
Ózgertilgen buiryqtyń tolyq mátinin myna siltemeden kórýge bolady.
