Qazaqstannyń Densaýlyq saqtaý ministrligi janyndaǵy Sanitarlyq-epidemiologiialyq baqylaý komitetiniń saitynda elimizdiń bas sanitar dárigeri Erlan Qiiasovtyń jańa qaýlysy jariialandy, - dep habarlaidy "Ult aqparat".
Oǵan sáikes, densaýlyq saqtaý uiymynda, jedel meditsinalyq járdem kóliginde, karantin úshin jergilikti atqarýshy organdar aiqyndaǵan úi-jailarda patsientter men meditsina qyzmetkeri kelisiminsiz aýdio, foto jáne video túsirýdi shekteý tarmaqshasy alynyp tastaldy.
Sondai-aq endi meditsina qyzmetkerleriniń úide meditsinalyq kómek kórsetýi, oshaqta epidemiologiialyq tekserý júrgizýi kezinde, naýqas pen onymen bailanysta bolǵan adamdar arasynda saýalnama júrgizý barysynda aýdio, foto jáne video túsirýge ruqsat berildi.
Bul shekteý eldiń bas sanitar dárigeriniń 2021 jyldyń 2 qyrkúiektegi №38 qaýlysynda kórsetilgen edi.
***
Eldiń bas dárigeri mynalardy qaýly etti:
"Qazaqstan Respýblikasynyń halqy arasynda koronavirýstyq infektsiia aýrýynyń aldyn alý jónindegi sharalardy odan ári kúsheitý týraly" Qazaqstan Respýblikasynyń Bas memlekettik sanitariialyq dárigeriniń 2021 jylǵy 2 qyrkúiektegi № 38 qaýlysyna (budan ári - № 38 BMSDQ) mynadai ózgerister men tolyqtyrýlar engizilsin:
- densaýlyq saqtaý uiymdarynda, jedel meditsinalyq járdem mashinalarynda, jergilikti atqarýshy organdar karantin úshin aiqyndaǵan úi-jailarda, sondai-aq meditsina qyzmetkerleri úide meditsinalyq kómek kórsetý, oshaqta epidemiologiialyq tergep-tekserý júrgizý, naýqastardan jáne bailanysta bolǵan adamdardan suraý jáne saýalnama alý kezinde patsientter men meditsina qyzmetkerleriniń kelisýinsiz olarǵa aýdio, foto jáne video túsirilim júrgizýge shekteý salý alyp tastalsyn;
- COVID-19-ǵa kúdikti naýqas tirkelgen jaǵdaida COVID-19-ben aýyratyn naýqastardan material alý jáne tasymaldaý, COVID-19-ǵa kúdikti naýqastardyń oshaqtarynda dezinfektsiialyq is-sharalar júrgizý kezinde qoldanystaǵy normativtik quqyqtyq aktilerde kózdelgen tártipti saqtaý tarmaqshasyna mynadai redaktsiiada jazylsyn: "COVID-19-ǵa kúdikti naýqas tirkelgen jaǵdaida COVID-19-ben aýyratyn naýqastardan material alý jáne tasymaldaý kezinde qoldanystaǵy normativtik quqyqtyq aktilerde kózdelgen tártipti saqtaýdy, osy qaýlyǵa 22-qosymshaǵa sáikes COVID-19 oshaqtarynda dezinfektsiialyq is-sharalardy júrgizý";
Qaýly 2021 jylǵy 20 qyrkúiekte saǵat túngi on ekiden bastap kúshine enedi.
