Mańǵystaý oblysynda Áleýmettik meditsinalyq saqtandyrý qorynyń qarajatyn jymqyrý deregi boiynsha tergeý bastaldy. Is boiynsha eki jekemenshik meditsinalyq ortalyq — “IBN SINA” jáne “SOFIE MED GROUP” klinikalarynyń basshylyǵy kúdikke ilindi, dep habarlaidy ult.kz.
Qarjylyq monitoring agenttiginiń málimetinshe, tergeý derekterine sáikes, klinikalar er adamdarǵa qoiylǵan “varikotsele” diagnozy boiynsha kórsetilgen qyzmetterdi rásimdeý kezinde áielderge arnalǵan joǵary tehnologiialyq operatsiianyń kodyn engizgen. Atap aitqanda, “kishi jambas aǵzalary men jatyr arteriialary tamyrlarynyń endovaskýliarlyq embolizatsiiasy” qyzmeti kórsetilgendei esep berilgen.
Nátijesinde 200-den astam er adamǵa negizsiz túrde qymbat meditsinalyq qyzmetter jazylyp, emdeý quny birneshe ese — tipti 10 esege deiin ósirilgen. Sonymen qatar 19 jaǵdaida patsientterdiń atalǵan klinikalarǵa múlde júginbegeni anyqtaldy.
Jalpy keltirilgen zalal kólemi 221 million teńgeden asady. Qazir tergeý amaldary jalǵasyp jatyr.
