Ótken jyldyń qaiǵyly saldary sanitariialyq-epidemiologiialyq qyzmettiń álsiz tustaryn kórsetip berdi. Bul týraly QR Parlamenti Májilisi tóraǵasynyń orynbasary Balaim Kesebaeva málim etti, dep habarlaidy QazAqparat.
«Búgin Úkimet saǵatynda biz qazaqstandyqtar úshin ózekti máselelerdiń biri – Qazaqstan Respýblikasyndaǵy sanitariialyq-epidemiologiialyq ahýal týraly máseleni qaraimyz. Bul taqyryp árdaiym halqymyzdyń densaýlyǵy úshin mańyzdy boldy. Alaida, qazirgi jaǵdaida onyń ózektiligi edáýir artty. Ózderińiz biletindei, koronavirýs infektsiiasyna qarsy kúres búkil otandyq densaýlyq saqtaý júiesin qozǵady. Qarapaiym sózben aitqanda, COVID-19 pandemiiasy bizdiń densaýlyq saqtaý salasyn ábigerge saldy. Bul, ásirese, sanitariialyq-epidemiologiialyq ahýalǵa áser etti. Ókinishke qarai, ótken jyldyń qaiǵyly saldary sanitariialyq-epidemiologiialyq qyzmettiń álsiz tustaryn kórsetip berdi», - dedi Kesebaeva Májilistegi Úkimet saǵatynda.
Onyń aitýynsha, ótken jyly aýrý órship, osy kúnge deiin 11 350 azamat (2020 jylǵy naýryz – 2021 jylǵy 4 qazan aralyǵy) COVID-19 qurbany boldy. Buǵan aýrýdyń ózi ǵana emes, eldiń densaýlyq saqtaý júiesinde tereń oryn alǵan kemshilikter de sebep boldy.
«Memleket basshysynyń tapsyrmasy boiynsha shuǵyl túrde infektsiialyq aýrýhanalar quryldy, mamandar asyǵys túrde qaita oqytyldy, emdeýdiń klinikalyq hattamalary birneshe ret ózgerdi, ómirlik qajetti dárilik preparattar men meditsinalyq tehnika bolmady. Aýrýhanalar men emhanalarda uiymdastyrýshylyq haos ornady. Aýrýdyń jalyny qarapaiym naýqastardy ǵana emes, meditsina qyzmetkerleriniń ózderin de sharpydy. «Halyq densaýlyǵy jáne densaýlyq saqtaý júiesi týraly» jańa Kodekste Bas sanitariialyq dárigerdiń erekshe mártebesi belgilenip, onyń ókilettikteri aiqyndaldy. Sanitariialyq-epidemiologiialyq qyzmetke úlken ókilettikter berildi», - dedi ol.
«Búgingi kúni bizdiń aldymyzda halyqty vaktsinalaý mindeti tur. Dál osy ujymdyq immýnitettiń qalyptasýy bizge – qalypty ómir saltyn, al ekonomikamyzǵa turaqtylyqty qaitarýǵa múmkindik beredi. Sondyqtan jappai vaktsinalaýdyń mańyzdylyǵyn halyqqa durys jetkizýdiń máni zor. Sonymen qatar, sanitariialyq-epidemiologiialyq qyzmettiń basqa baǵyttary, onyń ishinde qyzmettiń jumysyna qatysty máseleler de osy kezeńde nazardan tys qaldy. Máselen, asa qaýipti infektsiialar, vaktsinamen eńseriletin aýrýlar, jumystyń tsifrlyq formatyn qamtamasyz etý keiingi orynǵa ysyryldy. Men búgin osy máselelerge erekshe nazar aýdarý kerek dep oilaimyn», - dedi Májilisi tóraǵasynyń orynbasary.
