Búgin Májilistiń jalpy otyrysynda depýtat Baqtiiar Máken QR Premer-ministri Baqytjan Saǵyntaevqa jol politseilerdiń «ala taiaǵyna» qatysty depýtattyq saýal joldady, dep habarlaidy "Ult aqparat" Baq.kz portalyna silteme jasap.
«QR IIM ministriniń buiryǵyna sáikes, 2017 jyldyń 1 qańtarynan bastap Qazaqstannyń jol-patrýldik qyzmeti «ala taiaqty» paidalanbaityn boldy. Búgingi tańda politseiler qolymen jáne ysqyryǵynyń kómegimen kólikti toqtatady. Al patrýldeý kezinde jaryq, dybys qurylǵylaryn paidalanady. Jol qozǵalysy týraly zańda «ala taiaq» qarastyrylǵan. Ishki ister ministrligi buiryqty shyǵarar aldynda Eýropa elderindegi jol qaýipsizdigin qamtamasyz etý tájiribesin zerttegen. Iaǵni, «ala taiaq» paidalanbaityn halyqaralyq tájiribege súiengen. Degenmen Eýropadaǵy jol qozǵalysy men bizdegi jol qozǵalysyn salystyrýǵa kelmeidi. Aiyrmashylyǵy - jer men kóktei. Bizdiń burylystarda taiaǵy joq politsei múldem kórinbeidi. Adamdar sol taiaqqa úirenip qalǵan, sebebi politseidiń jileti, ásirese, qarańǵyda durys kózge ilikpeidi. «Ala taiaqtyń» jaryǵy bolǵandyqtan taiaqsha keshki, túngi ýaqyttarda jaqsy kórinedi. Bul burylystaǵy qozǵalysty politseidiń rettep turǵanyn kórýge múmkindik beretin. Búgingi kúni internette jol politseiine qatysty jaǵymsyz pikirler men rolikter qaptap tur. Biz jol politseileriniń imidjin kóterýdiń ornyna olardy osylaisha yńǵaisyz jaǵdaida qaldyryp otyrmyz. Osyǵan bailanysty jol politseilerine «ala taiaqty» paidalanýǵa tyiym salý kólik keptelisteri men apatty jaǵdailardy retteýde tiimsiz dep sanaimyz», - dedi B.Máken.
Depýtat keshegi merekelik sharalar kezinde bul jaǵdaidyń kólik júrgizýshilerdiń ashýyn týdyrǵanyn aitty. Osyǵan orai, májilismen politseilerdiń taiaqty paidalaný jaǵdailary men tártibin qaita qaraýdy surady. Bul jol qozǵalysy, kólik jáne jaiaý júrginshiler qaýipsizdigin qamtamasyz etý úshin qajet degen depýtat birneshe májilismenniń atynan saýal joldady.
