Foto\instagram.com/erasyl_bolat_
Májilis depýtaty Dáýlet Turlyhanovtyń uly Nurasyl Bolat jaza merzimin tolyq ótep, bostandyqqa shyqty, dep habarlaidy Ult.kz.
Bul aqparatty Qylmystyq-atqarý júiesi komiteti (QAJK) resmi túrde rastady. Vedomstvonyń málimetinshe, sottalýshy sot belgilegen jazany tolyq ótegen.
Eske salaiyq, bul is qoǵamda úlken rezonans týdyrǵan bolatyn. 2023 jyldyń 11 aqpanyna qaraǵan túni Almatydaǵy saýda ortalyqtarynyń biriniń avtoturaǵynda áskeri qyzmetker belgili advokatqa kúsh kórsetken.
Oqiǵa týraly alǵash bolyp advokat Oleg Chernovtyń jubaiy Anna Dmitrievich áleýmettik jelide jazdy. Onyń aitýynsha, olar taksige otyra bergen sátte belgisiz er adam kómek surap júgirip kelgen. Keiin belgili bolǵandai, advokatqa shabýyl jasaǵan adam — Dáýlet Turlyhanovtyń uly Nurasyl Bolat.
Bul derekti depýtattyń ózi de rastaǵan edi. Ol qoǵamnan keshirim surap, jaǵdaiǵa qatysty pikir bildirgen.
Alǵashynda sot Nurasyl Bolatty kináli dep tanyp, 1,7 mln teńge aiyppul salǵan. Alaida 2024 jylǵy 14 mamyrda Joǵarǵy Sot isti qaita qarap, úkimdi ózgertti. Nátijesinde oǵan eki jyl bas bostandyǵyn shekteý jazasy taǵaiyndalyp, jábirlenýshige tólenetin ótemaqy kólemi ulǵaityldy.
