Búgin Astanadaǵy Esil aýdandyq sotynda Seiitqazy jáne Áset Mataevtarǵa qatysty qozǵalǵan qylmystyq is boiynsha aldyn-ala sot tyńdaýy ótti. Sot otyrysynda Mataevtardyń qorǵaýshylary 7 ótinish bildirdi. Olar sot zalyna kompiýter ákelýdi, kardiolog-dárigerdiń otyrysqa qatysýyn, ákeli-balaly Mataevtardy úiqamaqtan kepilge bosatýdy, qylmystyq is materialdary boiynsha ekonomikalyq saraptama júrgizýdi, ózderi qorǵaityn adamdardy qolaily páterge aýystyrýdy, sottyń qylmystyq isti qaraý merzimin uzartýdy jáne basty sot otyrystaryn Almaty qalasynda ótkizýdi ótindi. Biraz ýaqyt keńesý bólmesine ketken sotqa tóraǵalyq etýshi sýdia Aqbolat Qurmantaev joǵarydaǵy ótinishterdiń tek úsheýin ǵana qanaǵattandyrdy.
Saiyp kelgende, sýdia joǵarydaǵy ótinishterdiń úsheýin ǵana qanaǵattandyrdy. Ol sotqa dárigerdiń qatysýyna ruqsat etti. Sebebi sottaǵy tyńdaýda qorǵaýshylar Seiitqazy Mataevtyń densaýlyǵynyń máz emes ekenin aityp, shaǵymdanǵan bolatyn. Sonymen qatar, sot sheshimimen qorǵaýshylar sot zalyna kompiýterlerin ákelýge múmkindik aldy. Úshinshiden, tóraǵalyq etýshi sýdia qylmystyq is boiynsha materialdardy qaraý merzimin uzartty. Sebebi qorǵaýshylar materialdarmen tolyq tanysý úshin isti qaraý merzimin uzartýdy suraǵan bolatyn. Aqbolat Qurmantaev atalǵan qylmystyq is boiynsha eń basty sot otyrysyn aǵymdaǵy jyldyń 23 tamyzyna aýystyrdy.
Jeti ótinishtiń tórteýi qanaǵattandyrylmady. Aiyptalýshylardy kepilge bosatý týraly ótinishke sýdia A. Qurmantaev mynadai túsinik berdi: «Aiyptalýshylardy úiqamaqtan kepilge bosatýdy týraly. Biz bul ótinishti qanaǵattandyrǵan joqpyz. Sebebi aiyptalýshylar kepilge bosatylǵan jaǵdaida olardyń tarapynan kýágerlerge qysym jasalýy múmkin». Aita ketelik, Qazaqstan jýrnalister odaǵynyń burynǵy basshysy Seiitqazy Mataev pen «QazTAG» aqparattyq agenttiginiń bas direktory Áset Mataev alaiaqtyq jáne salyq tóleýden jaltarý baptary boiynsha aiyptalýda.
Ámirlan Álimjan
