Pavlodar oblysynyń Aqsý qalasynda jappai tóbeles boldy. Jaqyn turǵan úidiń turǵyndary osy oqiǵany videoǵa túsirip aldy, dep habarlaidy Sputnik Qazaqstan.
Instagram jelisinde jariialanǵan videoda er adamdardyń tóbelesip jatqany anyq kórinedi. Bireýin jerge jyǵyp tastaǵan, taǵy ekeýi bastan teýip jatyr. Tóbelestiń sońynda aq jeide kigen er adam aǵashtyń túbinde jatqan joldasyn kóteredi. Osy kezde video avtorynyń "Masqara, óltirip tastady!" degen sózi anyq estiledi.
Pavlodar oblystyq politsiia departamenti jappai tóbelestiń mán-jaiyn anyqtady. Resmi málimetke sáikes, bul oqiǵa 4 tamyz kúni Aqsý qalasynda Hiýaz Dospanova kóshesiniń boiynda bolǵan. Turmystyq janjal jappai tóbeleske ulasqan.
"Tóbeleske qatysqandardyń barlyǵy ustaldy. Qarý qoldanylǵan joq. Birde-bir adam jaraqat almady. Meditsinalyq kómekke de eshkim júgingen joq. Tóbeleskender bir-birine aryz-shaǵym túsirmedi", - deidi politseiler.
Degenmen Qylmystyq kodekstiń 293-babynyń 2-bóligi ("Buzaqylyq, adamdar toby, aldyn ala sóz bailasý arqyly jasalǵan áreket") boiynsha sotqa deiingi tergeý sharalary bastaldy.
Aita keteri, osy bap boiynsha 5 000 AEK (14,5 million teńge) deiingi mólsherde aiyppul salýǵa ne sol mólsherde túzeý jumystaryna ne 1 200 saǵatqa deiingi merzimge qoǵamdyq jumystarǵa tartý qarastyrylǵan. Bes jylǵa deiingi merzimge bas bostandyǵy shektelip, sol merzimge bas bostandyǵynan aiyrylýy da múmkin.
