Foto: Shutterstock
Marokko koroli VI Muhammed eldegi qýańshylyqtyń saldarynan mal sanynyń kúrt azaiýyna bailanysty biylǵy Qurban aitta qoi shalý rásiminen bas tartýǵa shaqyrdy, dep habarlaidy CNN.
Resmi málimetterge sáikes, Marokkodaǵy iri qara men qoi sany 2025 jylǵa qarai sońǵy toǵyz jylda bolǵan qurǵaqshylyqtyń áserinen 38%-ǵa qysqarǵan.
"Bul dini rásimdi laiyqty túrde oryndaýǵa degen nietimiz eldegi klimattyq jáne ekonomikalyq qiyndyqtarmen ushtasatyn jaýapkershilikti talap etedi", – delingen koroldiń hatynda. Hatty Din isteri jónindegi ministr Ahmed Taofik Al Oula memlekettik telearnasynda oqydy.
Marokkonyń joǵarǵy dini jetekshisi korol «qazirgi qiyn jaǵdailarda qurbandyq shalý tabysy tómen halyqtyń kóp bóligine aýyr salmaq túsiretinin» atap ótti.
Elde jaýyn-shashyn mólsheri sońǵy 30 jyldaǵy ortasha deńgeiden 53%-ǵa tómen bolǵandyqtan, malǵa arnalǵan jaiylym jetispei, et óndirisi qysqarǵan. Bul ishki naryqta baǵanyń ósýine jáne iri qara, qoi men qyzyl et importynyń artýyna sebep boldy.
"Jaqynda el Aýstraliiadan 100 myń qoi satyp alý týraly kelisimge qol qoidy", – dep habarlady CNN.
Marokko 2025 jylǵy biýdjetinde ishki naryqtaǵy baǵalardy turaqtandyrý maqsatynda iri qara, qoi, túie jáne qyzyl etke importtyq baj salyǵy men qosylǵan qun salyǵyn ýaqytsha toqtatty.
