Elimizge esimi belgili kompozitor Marat Omarov koronavirýsqa qatysty taǵy bir án jazdy, dep habarlaidy QazAqparat.
«Kúni keshe ǵana Almaty qalasynda volonterlerdi marapattaýǵa arnalǵan sharaǵa qatysqan edim. Olar pandemiia kezinde qarttarǵa, az qamtylǵan otbasylarǵa, jetimderge kómek kórsetýge jumyldyrylǵan bolatyn. Jastarymyzdyń oryn alǵan jaǵdaiǵa beijai qaramaityndyǵy, olardyń belsendi qoǵamdyq ustanymy tań qaldyrdy. Bul óte jaqsy», - dedi kompozitor.
Sonymen qatar ol buǵan deiin «Koronavirýs, ket, ket, ket» dep atalatyn ázil án jazǵanyn, án qas-qaǵym sátte búkil áleýmettik jelige tarap ketkenin aitady. Sonymen qatar tanymal vainerler, ánshiler, mýzykanttar, blogerler men kishkentai balalar bul ánge qatysty óz nusqasyn jariialaǵanyn da eske salyp ótti.
«AQSh prezidenti Donald Tramp «Amerikada koronavirýspen kúreske milliondaǵan dollar jumsap, shyǵyndalýda. Al qazaq kompozitory bir án jazyp, onymen kúresip jatyr» dep ázildepti. Árine, bul qaljyń», - deidi Marat Omarov.
Tanymal kompozitor barsha qazaqstandyqty osynaý qiyn kezeńde uiymshyldyq tanytyp, karantin sharalaryn saqtaýǵa shaqyrdy.
«Barsha qazaqstandyqty maska kiiýge, áleýmettik araqashyqtyq saqtap, antiseptik paidalanýǵa shaqyramyn. Osy oraida men kompozitor retinde «Maska» dep atalatyn jańa án jazdym», - dedi ol.
Kompozitordyń jańa áninde:
«Nadevaite maski - maska kiińder,
Betperdeni taǵyp, jaýyp júrińder.
Biz birgemiz, árqashan bárimiz birge,
Biz senemiz, alda baqytty kúnder!» degen joldar bar.
Marat Omarov taiaý kúnderi jańa ánimen chellendj bastaýdy josparlap otyr.
«Qazir volonterlermen daiyndyq júrgizip jatyrmyn. Chellendj bastamaq oiym bar», - deidi kompozitor.
