Daniiardyń jartylai finalda alǵan jaraqaty qazaq jankúierleriniń mazasyn qashyrdy. Sońǵy sátke deiin aqyrǵy aiqasqa dárigerler ruqsat bermei qoia ma degen kúdik boldy. Finalǵa shyqqanyń ózinde jaraqaty qaita syr bere me degen qaýip bar edi. Daniiardyń ákesi ári bapkeri Marat Eleýsinov bul týraly QazAqparat tilshisine bergen suhbatynda aityp berdi.
«Búgin Daniiar halyqtyń úmitin aqtady. Sol úshin qatty qýanyp jatyrmyz. Men ǵana emes, búkil qazaq eli qýanyp jatyr. Daniiar meniń ǵana balam emes, ol búkil halyqtyń balasy», - dep atap ótti Marat Eleýsinov.
Sondai-aq, finaldaǵy qarsylasy men jekpe-jek týraly da óz oiyn bólisti.
«Ózderińiz bilesizder! Daniiar jartylai finalda úlken jaraqat aldy. Qabaǵy týra kóziniń janynan tereń jyrtylyp ketti. Jyrtylǵan jerin bir emes, eki ret tiktirdik. Finalda óte qiyn bolady-aý, dep qoryqqanymyzda jasyryn emes. Sebebi, qarsylasy onyń jaralanǵan jerin kózdep soqqy jasaityny anyq edi. Sosyn, biz Daniiarǵa qarsylasyn jaqsylap zerttep, ózgeshe aila-tásil jasaýdy tapsyrdyq. Tek aiaqpen jumys istep, qarsylasyńdy shegine júrip soqqy jasa, birden óziń alǵa umtylma degen bolatynbyz. Ol tapsyrmany oidaǵydai oryndady. Ózine kóp soqqy darytpady. Sonyń nátijesinde jeńiske jetti», - deidi Daniiardyń ákesi.
Ult portaly
