QR Sybailas jemqorlyqqa qarsy is-qimyl agenttiginiń tóraǵasy Marat Ahmetjanov nysandardyń sapasyz salyný sebepterin atady, dep habarlaidy QazAqparat.
«Igerilmeý nege oryn alady? Óitkeni, Esep komiteti, basqa da organdar bar. Qyzmettik ókilettikteri úlken baqylaýshy organdar kóp. Olar kez kelgen tenderdi zańsyz dep tanyp, oǵan shaǵym túsire alady. Bizde qurylystar nelikten sapasyz? Sebebi, jyl basynda tender jariialanǵanda bireý utyp alyp, ekinshisi shaǵymdanady. Osynaý sot sarsańy, prokýrorlyq tekserýler jarty jylǵa deiin sozylady. Al ol jyl sońyna deiin nysandy salynýy tiis. Ol qurylysty sapasyz salady nemese 2-formaǵa qol qoiyp, qylmystyq tekserý nysanyna ainalady. Joba bolýy tiis. Igergennen keiin qarajat bólip, birtindep júrgizilýi qajet», - dedi agenttik basshysy úkimettik emes uiymdar ókilderimen onlain kezdesýde.
Onyń atap ótýinshe, Úkimettiń maqsatty indikatory bar.
«Jyl sońynda biýdjetti igermegender, turǵyn úidi, ónerkásiptik nysandy paidalanýǵa berý maqsatty indikatorlaryn oryndamaǵandar jaýapqa tartylady. Mine, osyǵan bailanysty olar tolyq salynbaǵan nysandy joǵaryda atalǵan maqsatty kórsetkishterdi oryndaý úshin jumys istep tur dep málimdeýge májbúr bolady. Sondyqtan buǵan qatysty bizdiń kóp suraǵymyz bar. Qazir memlekettik satyp alý salasyn, onyń ishinde atalǵan memlekettik baqylaý-qadaǵalaý organdarynyń qyzmetin saralap jatyrmyz. Ol jerde asyra paidalaný, júgingenderdiń birine basymdyq berý óte kóp. Qazirdiń ózinde bul syzba qolymyzda bar. Kelesi joly munyń barlyǵyn kórsetemiz», - dedi Marat Ahmetjanov.
