Qurǵaqshylyq saldarynan maldary qyrylyp jatqan Mańǵystaý óńirine Aqtóbe oblysynan jem-shóp jetkiziledi. Bul týraly QR AShM Mal sharýashylyǵy ónimderin óndirý jáne qaita óńdeý departamentiniń direktory Erkebulan Ahmetov aitty, dep habarlaidy QazAqparat.
«Qazirgi ýaqytta Mańǵystaý oblysynda aýa raiynyń jaýyn-shashynsyz bolýyna bailanysty qurǵaqshylyq oryn alyp otyr. Osyǵan orai ministrlik tarapynan arnaýly jumys toby quryldy. Jumys toby 26-30 mamyr aralyǵynda Mańǵystaý oblysynyń barlyq aýdandaryn aralyp, qalyptasqan jaǵdaimen tanysyp shyqty. Osy aida ministrlik tarapynan da, Úkimet tarapynan da jedel is-sharalar qabyldaý maqsatynda ákimshilik deńgeide arnaýly shtab quryldy. Shtabtyń negizgi maqsaty - mal ólimi jáne mal azyǵy naryǵynda alypsatarlyq oryn almaýy úshin jem-shóp jetkizý», - dedi ol.
Erkebulan Ahmetovtiń sózine qaraǵanda, shtab ótken aptada Aqtóbe oblysynda bolyp, kelissóz júrgizdi. Kelissóz nátijesinde Mańǵystaý men Aqtóbe oblystary ákimdikteri arasynda memorandým jasaldy. Memorandým aiasynda Qobda, Baiǵanin, Temir aýdandarynda shóp shabatyn shabyndyqtar anyqtaldy. Sol jerlerden mańǵystaýlyq fermerlerdiń malyna shóp jetkizý uiymdastyrylady.
«Sonymen qatar byltyrǵy jyldan qalǵan 10 myń tonna jońyshqany jetkizý máselesi pysyqtaldy. Munan bólek, aqtóbelik sharýalardyń jem-shópti tasymaldaý jaiy qarastyryldy. Qaziri «Kaspii» ÁKK arqyly 204 mln teńge qarajat bólindi. Qarajat atalǵan jem-shópti satyp alý jáne tasymaldaý shyǵyndaryn jabýǵa jumsalady. Onyń ishinde 54 mln teńgege 630 tonna arpa «Azyq-túlik kelisimshart korporatsiiasynan» bólinedi. Qazir satyp alý rásimdelip jatyr. Kelesi aptaǵa deiin arpany temir jolmen jetkizý máselesi sheshiledi», - dedi departament direktory.
Onyń atap ótýinshe, Mańǵystaý oblysynda 536 bas jylqy ólgen. Veterinarlyq organdardyń ókilderi ólekselerdi kómý jumystaryn uiymdastyrdy. Jylqy ólim-jitimi negizinen Túpqaraǵan, Mańǵystaý aýdandarynda tirkelip otyr.
«Búgingi naqty maqsat – mal ólimine jol bermeý. Ol úshin jem-shópti tezirek jetkizý kerek. Mańǵystaý oblysynda ortasha temperatýra +35, +40 gradýs bolyp tur. Kelgen shyǵyndy anyqtaý jumystary júrgizilip jatyr», - dedi ol.
