Sońǵy jyldary Mańǵystaý oblysynda qurǵaqshylyq kúsheiip, bul sharýa qojalyqtaryna qatty áser etip jatyr, dep habarlaidy "Ult aqparat".
«Jaýyn-shashynyń bolmaýy, tasymaldanatyn azyqtyń jetispeýi, aimaqtaǵy aptap ystyq malǵa kútim jasaýǵa keri áserin tigizip otyr. Ótken aptada oblys ákimdiginiń uiymastyrýymen jutaǵan malǵa azyq tasý qolǵa alyna bastady. Jem-shóp Qazaqstannyń basqa óńirlerinen ákelinip jatyr. Osy jumystar aiasynda «Kaspii» áleýmettik kásipkerlik korporatsiiasy arqyly qajetti qarajat bólingen. Sonymen qatar, oblys ákimdigi Qostanai, Batys Qazaqstan, Aqtóbe oblystarymen mal azyǵyn jetkizý, jaiylymdar men shabyndyq jerlerdi bólip paidalaný týraly kelissózder júrgizip jatyr», delingen ákimdik habarlamasynda.
Jergilikti ákimdiktiń baspasóz qyzmeti bergen málimet boiynsha, oblys ákiminiń orynbasary Ǵalymjan Niiazov bastaǵan jumys toby Aqtóbe oblysynyń Alǵa, Baiǵanin, Muǵaljar, Qobda, Temir aýdandaryna aralap, jaǵdaidy zerdeleýde. Al Beineý aýdanynyń ákimi sharýa qojalyqtaryna kómek kórsetý úshin Aqtóbe oblysyna baryp, kórshi aýdandardyń basshylarymen kelisti. Al Beineý aýdanynyń ákimi Beineýbek Ábilov bastaǵan arnaiy delegatsiia aýyl sharýashylyǵy mamandarymen jáne depýtattarmen, Baiǵanin aýdanynyń ákimi Qairat Otarovpen kezdesý ótkizip, qurǵaqshylyqtyń saldaryn joiý úshin azyq daiyndaýǵa shóp shabý, shekara mańyndaǵy aýdandarda maýsymdyq jaiylymdardy paidalaný máselelerin talqylaǵan.
Delegatsiianyń jumysy kezinde aýyl aqsaqaly Rahym Sembiǵaliev 1950-1993 jyldary Shyńǵyrlaý sovhozynyń shopandary eki jaqty kelisim aiasynda jailaý retinde Jetikaq, Kóltaban, Aman, Sara eldi mekenderin paidalanǵanyn eske alyp, buryn da ondai tájiribe bolǵanyn jetkizgen.
Kezdesý qorytyndysy boiynsha mynadai kelisimder jasalyp, memorandým bekitildi.
- Beineý aýdanynyń aýmaǵyna jatatyn Jetikaq jaiylymdaryn paidalanatyn sharýashylyq ielerine túsinistikpen qaraý, jer máselesin zańdastyrý;
- Baiǵanin aýdanynda shóp shabý úshin jaramdy jer anyqtalǵan jaǵdaida Beineý aýdanynyń shabyndyq brigadalaryna jer bólý;
- Baiǵanin aýdanynyń sharýashylyqtarynan tiimdi baǵamen jemshóp satyp alý;
- shekara mańyndaǵy aýdandarda dala órtteriniń saldaryn boldyrmaý, aldyn alý jáne joiý.
