Mańǵystaý oblysynda ótetin «Ábish álemi» I Halyqaralyq festivaline shet memleketten 8 teatr qatysady. Bul týraly Óńirlik kommýnikatsiialar qyzmetinde ótken brifingte N.Jantórin atyndaǵy oblystyq-mýzykalyq drama teatrynyń direktory Nurniiaz Muhanov aitty, dep habarlaidy "Ult aqparat".
Qazaqstannyń Eńbek Eri, Halyq jazýshysy Ábish Kekilbaevtyń shyǵarmalaryn nasihattaýǵa arnalǵan alǵashqy teatr festivali 2016 jyly jeltoqsan aiynda respýblikalyq deńgeide ótti. Oǵan el óńirlerinen – 6 jáne Reseiden Noǵai teatry qatysqan bolatyn. Biylǵy qazan aiynda QR Mádeniet jáne sport ministrliginiń jáne TÚRKSOI-dyń qoldaýymen, Mańǵystaý oblysy ákimdiginiń uiymdastyrýymen ótetin festivaldiń ereksheligi – oǵan álemniń túkpir-túkpirinen birneshe teatr ujymy qatysady. Atap aitqanda, Armeniianyń Abelian Vanadzor memlekettik drama teatry, Grýziianyń Tbilisidiń Memlekettik Azerbaidjan teatry, Irannyń Bile Savar Barbod teatry, Ózbekstannyń Horezm teatry, Tájikstannyń K.Hýdjandi atyndaǵy mýzykalyq komediia teatry, Túrkiianyń Memlekettik teatry, Túrikmenistannyń Memlekettik teatry qoiylymdaryn usynady.
Al Qazaqstannan festivalge M.Áýezov atyndaǵy memlekettik akademiialyq drama teatry, J.Aimaýytov atyndaǵy Pavlodar oblystyq drama teatry jáne N.Jantórin atyndaǵy drama teatry qatysady.
«Ókinishke orai, Ábekeńniń klassikalyq kórkem shyǵarmalarynyń sahnalanǵany, onyń ishinde ózge tilderge aýdarylǵany tym az. Sondyqtan olarǵa biylǵy festivalge óz repertýaryndaǵy ulttyq jáne klassikalyq qoiylymdarmen qatysýǵa ruqsat etildi. Al bolashaqta Ábekeń shyǵarmalaryn ulttyq jáne shet elderdiń sahnalarynda sóiletýge jan-jaqty daiyndyq júrgiziledi dep oilaimyn. Bul rette, jalǵyz bizdiń teatr ǵana emes, Ábish aǵanyń ádebi murasyna janashyr qalamger áriptesteri, basqa da yntaly ziialy qaýym belsene at salysýy tiis», - dedi Nurniiaz Muhanov.
Ábish Kekilbaiulynyń 80 jyldyǵyna arnalǵan merekelik sharanyń ashylý saltanaty 11 qazan Amfiteatr sahnasynda bolady. Ony oblystyń barlyq turǵyny kelip tamashalai alady.
