Aqtaý qalasyndaǵy Nazarbaev Ziiatkerlik mektebiniń 10 oqýshysy qańtardyń 31-i men aqpannyń 1-i aralyǵynda Lionda ótken Birikken Ulttar Uiymynyń Modeli halyqaralyq konferentsiiasyna qatysyp qaitty. «Sý: ózgeristerge qulshynys» taqyrybynda ótken jiynǵa Izrail, Ulybritaniia, Qazaqstan men Frantsiiadan 350 joǵary synyp oqýshylary jáne 50 stýdent qatysty, – dep habarlaidy NZM baspasóz qyzmeti.
Lionda segizinshi ret ótken sharany Liondaǵy halyqaralyq mektep pen Skole halyqaralyq ýniversiteti stýdentteri uiymdastyrǵan. Kóshbasshylardyń basyn qosqan jiynǵa Nurkamal Alihan, Quralai Sanat, Aidana Bakitova Kámshat Aqmuratova Mirlanbek Shansharov, Aqbota Alpamysova, Dana Esbergenova, Aqjibek Saǵyndyqqyzy, Hisami Tomiris esimdi oqýshylar qatysyp, sý taqyrybyndaǵy ózekti máselelerdi sheshýge arnalǵan rezoliýtsiialardy qabyldady.
«BUU 2015 jyly 17 turaqty damý maqsatyn aiqyndady. ILYMUN konferentsichsy osy joly 6 –shy (sý jáne sanitariia) jáne 14-shi (sý ómiri) maqsattaryna toqtaldy. Qazirgi tańda sý máselesi dúnie júzin alańdatyp otyr. Jer betindegi demografiianyń ósýi jáne jahandyq jylyný jáne sý kózderiniń qurǵap qalýy bul taqyryptyń ózektiligin arttyryp otyr. Sonyń nátijesinde jańa tiptegi halyqaralyq konfliktiler týyndaýda. Konferentsiia barysynda delegattar óz eliniń qyzyǵýshylyqtaryn eskere otyryp, máseleniń sheshimin tabýy tiis» delingen konferentsiianyń resmi málimdemesinde.
Al aqtaýlyq oqýshylar atalǵan jiynǵa tuńǵysh ret qatysty.
- Konferentsiia barysynda bizder ǵalamdyq problemalardy sheshýge arnalǵan rezoliýtsiialardy qabyldadyq. Bul meniń tulǵalyq damýyma úlken septigin tigizdi dep oilaimyn. Sebebi, men tabiǵat-anaǵa degen jaýapkershilikti sezinip, komandada jumys jasaý qabiletimdi arttyrdym. Ekinshiden, men tuńǵysh ret mýltikýltýralizm túsinigimen betpe-bet keldim. Jiynda aǵylshyn tilinde sóilegenimizben, grek, frantsýz, irlan tilderin de estip jattym, - deidi tushy sý resýrstaryn qoldaný jáne saqtaý týraly baiandama oqyǵan Tomiris Hisami.
Aita keteiik, Aqtaý qalasyndaǵy Nazarbaev Ziiatkerlik mektebinde BUU Modeli klýby 2018 jyldan beri jumys istep keledi. Bul klýbta joǵary synyp oqýshylary álemdegi eń mańyzdy uiym sanalatyn Birikken Ulttar Uiymynyń simýliiatsiiasyn jasap, ǵalamdyq problemalardy diplomatiialyq turǵyda sheshý joldaryn izdeidi. Osylai bilim ordasynyń ujymy ziiatkerlik mektep oqýshylaryna diplomatiia, kóshbasshylyq, kópshilik aldynda sóileý, syni oilaý qabiletterin damytýǵa kúsh salyp otyr.
BUU Modeli konferentsiiasy endi 2020 jyldyń 23-24 naýryzynda Aqtaý qalasyndaǵy Nazarbaev Ziiatkerlik mektebinde uiymdastyrylmaq.
