Mindetti áleýmettik meditsinalyq saqtandyrý boiynsha qazaqstandyqtar kez kelgen meditsinalyq mekemede stomatologiialyq qyzmetti ala alady. Bul týraly «Áleýmettik meditsinalyq saqtandyrý qory» KEAQ Almaty qalalyq filialy direktory Tleýhan Ábildaev málim etti, dep habarlaidy QazAqparat.
Onyń aitýynsha, 2020 jyldan bastap stomatologiialyq qyzmet aqysyn tóleý shemasy ózgerdi. Buryn qyzmet aqysy konsýltativtik-diagnostikalyq qyzmet kórsetetin klinikaǵa tikelei aýdarylatyn bolsa, biyldan bastap emhanalar arqyly tólenedi. Ol úshin emdeý uiymdary arasynda qosymsha kelisimshart bekitiledi.
«Saqtandyrý engizilgenge deiin stomatologiialyq kómek tek patsienttiń tirkelgen emhanasy arqyly ǵana kórsetiletin. Jańa júieniń arqasynda atalǵan sanattaǵy azamattar bul qyzmetti elimizdiń kez kelgen jerinde paidalana alady», - dedi Tleýhan Ábildaev.
MSQ qalalyq filialy málimetine súiensek, azamattardyń jekelegen sanattary, dálirek aitqanda, 18 jasqa deiingi balalar men júkti áielder ambýlatoriia deńgeiindegi stomatologiialyq kómekti saqtandyrý paketi arqyly ala alady.
Olar: tisti jansyzdandyrý, plomba salý, terapevtiń qabyldaýy, pýlpit pen periodontitti emdeý, gipoplaziia men fliýoroz saldarynan anatomiialyq pishini buzylǵan tisti tolyq qalpyna keltirý syndy taǵy da basqa qyzmetterdi paidalana alady. Sonymen qatar, tisti juldyrý, til men erin júgenshigindegi aqaýdy joiý, jaqty rentgenge túsirý, anesteziia syndy qyzmetter de osy paket sheńberinde kórsetiledi.
Al, shuǵyl stomatologiialyq kómek burynǵysha memleket tarapynan kepildendirilgen tegin meditsinalyq kómek paketinde qaldyryldy. Shuǵyl kómekke: 18 jasqa deiingi balalar, júkti áielder, Uly Otan soǵysynyń qatysýshylary, 1,2,3 toptaǵy múgedekter, «Altyn alqa», «Kúmis alqa» ielengen kóp balaly analar, ataýly áleýmettik kómek alýshylar, jasyna qarai zeinetke shyqqan zeinetkerler, juqpaly, áleýmettik mańyzy bar aýrýlar men qorshaǵan ortaǵa qaýip tóndiretin syrqattarǵa shaldyqqan patsientter júgine alady.
Mysaly, hirýrgtiń qabyldaýy, tisti julý, abstsesti ashyp tazartý, odontegendi isikti kesip alyp tastaý, alveolitti emdeý, tis tamyry nevritin emdeý, aýyz qýysyndaǵy jumsaq tinderdi kesip alyp tastaý, jaq-bet súiegindegi jaralardy emdeý taǵy basqa qyzmetter tegin kórsetiledi. Sondai-aq, jaq-bet súiegi aqaýymen týǵan nárestelerge arnalǵan ortodontiialyq kómek túrleri de memlekettik tapsyrys sheńberinde kórsetiledi.
Jalpy, qazir Almaty qalasynda 45 meditsinalyq uiym stomatologiialyq qyzmet kórsetedi.
