Almaty qalasynyń áleýmettik meditsinalyq saqtandyrý qorynyń basshysy Tileýhan Ábildaev onlain brifing barysynda mindetti áleýmettik meditsinalyq saqtandyrý júieniń jetistigi týraly aitty, dep habarlaidy QazAqparat.
Tileýhan Ábildaevtyń aitýynsha, Qazaqstanda ekinshi jyl meditsinalyq saqtandyrý júiesi jumys isteýde. Onyń bastalýy pandemiia kezeńimen tuspa-tus keldi, alaida koronavirýspen úzdiksiz kúreske qaramastan, MÁMS meditsinalyq saqtandyrý júiesiniń tolyqqandy jumys isteitinin kórsetti.
Meditsinalyq saqtandyrýdyń arqasynda Almaty qalasynyń densaýlyq saqtaý júiesi 2021 jyly 214 mlrd teńgeden astam qarjy aldy.
«2021 jylǵa naqtylanǵan biýdjet 214,6 mlrd teńgeni qurap, 2020 jylǵy biýdjetten 3%-ǵa ósti, onyń ishinde tegin meditsinalyq kómektiń kepildik berilgen kóleminiń sheńberinde 127,1 mlrd teńge, MÁMS paketinde 87,5 mlrd teńge», - deidi spiker.
Ótken jylmen salystyrǵanda joǵary tehnologiialyq operatsiialardy qarjylandyrý artty. Eger 2020 jyly olardy júrgizýge 11,8 mlrd teńge bólinse, biyl 12,9 mlrd teńge bólindi.
Tileýhan Ábildaev mindetti meditsinalyq saqtandyrýdyń arqasynda EKO siiaqty qymbat qyzmetter qoljetimdi bola bastaǵanyn atap ótti.
«Mysaly, eger 2020 jyly 563 mln teńge somasynda 643 EKO manipýliatsiiasy júrgizilse, biyl 1238 qyzmetke 1,1 mlrd teńge bólindi. Ósim 2 ese baiqalady. Osy jyldyń 4 aiynda somasy 434 mln teńgege EKO-nyń 459 rásimi ótkizildi», - dedi meditsinalyq saqtandyrý qorynyń ókili.
Sondai-aq, byltyr 184 kardiohirýrgiialyq ota jasaldy, biyl 631 mln teńgege 270 qyzmet kórsetý josparlanǵan.
Qor osy jyldyń 4 aiynda Almaty qalasy boiynsha MÁMS paketinde meditsinalyq kómekke aqy tóleýge shamamen 42,6 mlrd teńge jumsady.
Sonymen qatar, qor halyqqa joǵary tehnologiialyq qyzmet kórsetkeni úshin 6,3 mlrd teńgeden astam qarajat tóledi, taǵy 2 mlrd teńge kúndizgi statsionar qyzmetterin tóleýge baǵyttaldy.
MÁMS júiesi aiasynda josparly skriningterge 400 mln teńge, ońaltý kómegine 3 mlrd teńge bólindi. Ońaltý qyzmetterine 7,7 mlrd teńge bólindi. Bul meditsinalyq saqtandyrý bastamalarynyń biri – halyq úshin ońaltýdyń qoljetimdiligin arttyrý.
Jyl saiyn ońaltýdy usynýshylar sany artyp keledi. Mysaly, 2019 jyly qalada ońaltý qyzmetterin tek 4 emhana kórsetken bolsa, qazir olardyń sany 73-ke jetti.
