QR Premer-Ministri Asqar Maminniń tóraǵalyǵymen ótken QR Úkimetiniń otyrysynda aýyl sharýashylyǵy egin jinaý jumystaryn júrgizý barysy qaraldy, dep habarlaidy "Ult aqparat" primeminister.kz saityna silteme jasap.
Biylǵy jylǵy 1 qyrkúiektegi jaǵdai boiynsha egin jinaý jumystary respýblikanyń barlyq óńirlerinde júrgizilip jatyr. 2019 jyly aýyl sharýashylyǵy daqyldary egilgen aýmaq kólemi – 22,2 mln ga (2018 j. deńgeiden 206 myń ga nemese 0,9%-ǵa artyq). Dándi daqyldar – 15,4 mln gektar (onyń 11,4 mln gektary – bidai), maily daqyldar 2,9 mln gektar alańda, maqta – 131,1 myń gektarǵa, qant qyzylshasy – 19,6 myń gektarǵa, kartop pen kókónis-baqsha daqyldary – 452,4 myń gektarǵa, azyqtyq daqyldar – 3,3 mln gektarǵa egilgen.
Jambyl (99,6%) jáne Túrkistan (100%) oblystarynda dándi daqyldardy jinaý aiaqtalý satysynda. Bul óńirler boiynsha astyq túsimi orta eseppen 19 ts/ga qurady. Jalpy elimiz boiynsha 4,5 mln ga aýmaqta dándi daqyldar jinaldy - 22,8%. Ortasha túsimdiligi 11,5 ts/ga bolǵanda 5,2 mln. tonna astyq bastyryldy.
Egin jinaý jumystaryn ýaqtyly júrgizý úshin qajetti 395 myń tonna janar-jaǵar mai bólindi (aýyl sharýashylyǵy taýarlaryn óndirýshiler úshin ortasha baǵasy 179 teńge/litr). Ortasha oryndalý paiyzy – 50%.
QR Premer-Ministri Asqar Mamin egin oraǵyn sapaly jáne ýaqytynda ótkizý, birinshi kezekte, aýyl sharýashylyǵy óndirýshilerin janar-jaǵarmaimen qamtamasyz etý boiynsha barlyq qajetti sharalardy qabyldaýdy tapsyrdy.
«Egin jinaýǵa ýaqyt az qaldy. Negizgi astyqty óńirlerde aýa-raiy turaqsyz bolyp tur. Sondyqtan egindi ýaqytynda jinaýmen qatar, jumysty barynsha shyǵynsyz oryndaý óte mańyzdy. Jalpy egin oraǵy naýqanynyń júrgizilý barysy jaman emes. Úkimet tarapynan egin oraǵyn qarjylai jáne materialdyq-tehnikalyq qamtamasyz etý úshin barlyq qajetti sheshimderdi qabyldandy», — dedi Asqar Mamin.
Úkimet basshysy astyq saqtaý kásiporyndarynyń astyqty qoimaǵa ýaqytyly qabyldaýy qajettigine jáne jinalǵan astyqty saqtaýdyń tiisti sharalaryn qamtamasyz etýge erekshe nazar aýdardy.
Jiynda aýyl sharýashylyǵy ministri S. Omarov, energetika ministri Q. Bozymbaev, Aqmola oblysynyń ákimi E. Marjyqpaev, Qostanai oblysynyń ákimi A. Muhambetov, Soltústik Qazaqstan oblysynyń ákimi Q. Aqsaqalov, Jambyl oblysynyń ákimi A. Myrzahmetov, Túrkistan oblysynyń ákimi Ó. Shókeev, sondai-aq QR Premer-Ministriniń orynbasary J. Qasymbek baiandama jasady.
