QR Premer-Ministri Asqar Mamin memorgandar men óńir ákimdikterine áleýmettik mańyzy bar azyq-túlik baǵasyn turaqtandyrýdy tapsyrdy, dep habarlaidy QazAqparat.
«Qazaqstan ekonomikasy oń ósim kórsetýde. Ótken jyldyń osyndai kezeńimen salystyrǵanda biylǵy bes ai ishinde ósim 1,6% boldy.
Ekonomika damýynyń negizgi draiverleri – óńdeý ónerkásibinde ósim 7,2% paiyz, mashina qurastyrýda 21,1%, onyń ishinde avtomobil jasaýda 26,4% jáne lokomotivter men vagondar qurastyrýda ósim 54,9% boldy.
Óńdeýshi sektorda joǵary serpin kórsetken salalar – himiia ónerkásibinde ósim 9,8%, jeńil ónerkásibinde 5,5%, metallýrgiiada 2,7%, farmatsevtikada 25,7% jáne munai óńdeýde 3,4%.
Qurylys sektorynda ósim 11,3% paiyz jáne turǵyn úidi paidalanýǵa berýde 12,5% - nemese 4,6 mln sharshy metr joǵary ósim qarqyny qamtamasyz etildi.
Aýyl sharýashylyǵyndaǵy ósý qarqyny – ornyqty, 3,1% qurap otyr», - dep atap ótti Premer-Ministr búgingi Úkimet otyrysynda.
Búkil ekonomikadaǵy negizgi kapitalǵa investitsiialardyń ósýi, taý-ken óndirýdi eseptemegende, 25,5% qurady. Qyzmet kórsetý sektorynda, atap aitqanda, saýda jáne bailanys salasynda ekinshi ai qatarynan oń qarqyn baiqalyp otyr.
«Biylǵy qańtar-mamyr ailarynyń qorytyndysy boiynsha barlyq 7 negizgi makrokórsetkish boiynsha Mańǵystaý oblysy men Shymkent qalasynda ósim baiqalyp otyr. 6 negizgi kórsetkish boiynsha jeti óńirde joǵary qarqyn tirkeldi. Bular – Aqmola, Aqtóbe, Jambyl, Qaraǵandy, Pavlodar, Almaty jáne Túrkistan oblystary. Jeti óńirde 5 kórsetkish boiynsha oń serpin bar. Bul – Atyraý, Shyǵys Qazaqstan, Qostanai, Qyzylorda, Soltústik Qazaqstan oblystary men Nur-Sultan, Almaty qalalary. Batys Qazaqstan oblysynda eń tómengi kórsetkishter baiqaldy», - deidi Mamin.
Premer-Ministr ósý serpinin ustap turý úshin ekonomikany odan ári ártaraptandyrý, investitsiialar tartý jáne jumys oryndaryn qurý jumystaryn jalǵastyrý qajettigin aitty.
«Sonymen qatar, infliatsiia deńgeiiniń ósýi baiqalýda. Bul – birqatar taýarlar men aqyly qyzmetter baǵasynyń ulǵaiýyna bailanysty. Óńirler ákimdikterine memlekettik organdarmen birge áleýmettik mańyzy bar azyq-túlik taýarlarynyń baǵasyn turaqtandyrý, tamaq ónimderiniń óndirisin yntalandyrý jáne olarmen ishki naryqty molyqtyrý boiynsha naqty sharalar qabyldaýdy tapsyramyn.
Básekelestikti qorǵaý jáne damytý agenttigi óńirler ákimdikterimen birge áleýmettik mańyzy bar azyq-túlik taýarlarynyń baǵasyn negizsiz ósý faktileriniń jolyn kesýdi der kezinde qamtamasyz etsin», - dep tapsyrma berdi ol.
Sonymen birge, kirister boiynsha biýdjettiń atqarylýy biylǵy josparǵa qatysty 101,6% deńgeiinde qalyptasty.
«Ákimshilerge ai saiynǵy josparly igerýdi qamtamasyz etýdi tapsyramyn. Alty aidyń qorytyndysy boiynsha eldiń áleýmettik-ekonomikalyq damý qorytyndylaryn Memleket basshysy deńgeiinde qarastyrý kózdelip otyr. Ministrlikter men ákimdikterge jumysty jandandyryp, ulttyq ekonomikanyń josparlanǵan ósý kórsetkishterine qol jetkizý boiynsha Memleket basshysy belgilep bergen mindetterdi iske asyrýda tiisti sharalar qabyldaýdy tapsyramyn», - dedi Asqar Mamin.
