Almatyda belsendi Janbolat Mamaidyń jaqtastary uiymdastyrmaq bolǵan jiyn ótpei qaldy.
Tirkelmegen Demokratiialyq partiianyń ókilderi burynǵy «Saiahat» bazarynyń mańyna jinalyp, Nur Otan partiiasy tóraǵasynyń orynbasary Baýyrjan Baibekke qarsy aktsiia ótkizbek bolǵan. Alaida, sol mańǵa ondaǵan adamnan quralǵan partiia jaqtastary da jinalyp, «mamaishylardyń» jiyn ótkizýine jol bergen joq.
Jinalǵan jurt «Mamai – qarabet», «Mamai, qaryzdy qaitar» dep urandatty. Olar qoldaryna plakat ustap, Janbolat Mamaidy «satqyn» dep te aiyptady. Al, dempartiialyq on shaqty adam bul toptan qashyp, narazylyq aktsiiasyn úzýge májbúr boldy.
Aita ketý kerek, bul aktsiiaǵa Janbolat Mamaidyń ózi de, áieli Inga Imanbai da qatysqan joq. Olar osy aktsiiaǵa ózderiniń qolastyndaǵy adamdaryn jiberse kerek. Dese de, kýágerler Mamaidy Raiymbek kóshesiniń boiynda narazylyq aktsiiasyn kólik ishinen baqylap otyrǵanyn baiqaǵan.
Eske salaiyq, Janbolat Mamai men onyń áieli Inga Imanbai biyl kóktemde Baýyrjan Baibekti jemqor dep aiyptap, birneshe videomaterial jariialaǵan bolatyn. Artynsha Nur Otan partiiasy Tóraǵasynyń birinshi orynbasary erli-zaiyptyny sotqa berdi. Sotta Mamai men Imanbai videorolikte aitqan málimetterine dálel keltire almaǵandyqtan jeńilip qaldy. Endi olar atalǵan rolikterdi internetten óshirip, 800 myń teńgeden astam sot shyǵynyn óteýi tiis. Baibek bul qarajatty aýtizmmen aýyratyn balalardyń emine jumsaitynyn málimdedi.
