Maqtaaral aýdanynda sýǵa aǵyp bara jatqan Qazaqstan týyn alyp shyqqan politsei áreketi jeli qoldanýshylary arasynda qyzý talqylandy, dep habarlaidy "Ult aqparat".
Bul jaǵdai keshe aýmaǵyn tolyqtai sý basqan Ferdoýsi aýylynda bolǵan. Jetisai aýdandyq politsiia basqarmasynyń ofitseri Esimjan Nádirov sýdan kók týdy alyp shyqty.
Jańa mekteptiń aldynda Qazaqstan týynyń sý ishinde jatqanyn kórgen Jetisai aýdandyq politsiia basqarmasynyń ofitseri Esimjan Nádirov sýǵa túsip, týdy alyp shyqty.
Osy kórinisti jergilikti halyq uialy telefondaryna túsirip, áleýmettik jelige taratyp jibergen.
Esterińizge sala keteiik, 1 mamyrda Sardoba sý qoimasy bógetin sý shaiyp ketýine bailanysty Ózbekstannyń Syrdariia oblysyndaǵy eldimekendi sý basty.
Sonyń saldarynan Maqtaaral aýdanynda shekara mańyndaǵy birneshe kollektor sýǵa tolyp qalǵan. Maqtaaraldaǵy ortalyq kollektordan sý syrtqa jaiylyp, Jeńis, Jańa turmys aýyldaryn sý alyp ketti. Keiin taǵy da 10 aýyldy sý alǵany belgili boldy.
