Magistratýraǵa keshendi testileýge (KT) qatysý úshin ótinishterdi qabyldaý 19 shildege deiin uzartyldy. Bul sheshim karantindik sharalardyń kúsheiýine bailanysty qabyldandy, dep habarlaidy "Ult aqparat" QR BǴM baspasóz qyzmetine silteme jasap.
Magistratýraǵa keshendi testileý 1 tamyzda bastalyp, 15 tamyzǵa deiin jalǵasady. KT-ǵa qatysý úshin ótinish qabyldaýdy QR BǴM Ulttyq testileý ortalyǵynyń saity arqyly joǵary oqý oryndarynyń qabyldaý komissiialary júrgizedi. Keshendi testileýdiń qorytyndysy boiynsha kýálik elektrondy túrde testilenýshiniń jeke kabineti arqyly beriledi. Magistratýrada oqýǵa bilim grantyn taǵaiyndaý konkýrsyna qatysý úshin ótinishterdi qabyldaý 16 - 20 tamyz aralyǵynda júzege asyrylady.
Biyl magistratýra men doktorantýraǵa túsý úshin birqatar jańashyldyqtar qarastyrylǵan.
«2020 jyly magistratýra men doktorantýraǵa túsý jáne qabyldaý rásimine birqatar ózgerister engizildi. Mysaly, memlekettik nemese resmi tili aǵylshyn tili bolyp tabylatyn elderde sheteldik joǵary jáne joǵary oqý ornynan keiingi bilim berý uiymdarynda oqýdy aiaqtaǵan jáne sheteldik akkreditteý organdarynyń mamandandyrylǵan akkreditteýi bar tulǵalar keshendi testileýdiń «Shet tili» blogynan bosatyldy», – dep málimdedi QR BǴM Joǵary jáne joǵary oqý ornynan keiingi bilim departamentiniń direktory Ádilet Toibaev.
Doktorantýraǵa túsý úshin memlekettik nemese resmi tili aǵylshyn tili bolyp tabylatyn sheteldik joǵary jáne joǵary oqý ornynan keiingi bilim berý uiymdaryn aiaqtaǵan úmitkerler shetel tilin meńgerýdiń jalpyeýropalyq standarttaryna sáikes shet tilin meńgergendigin rastaityn halyqaralyq sertifikattardy usynbaidy. Magistratýraǵa túsý úshin ótinishterdi qabyldaýdy QR BǴM Ulttyq testileý ortalyǵynyń https://pvo-zayav.testcenter.kz saity arqyly 3 shildeden 3 tamyzǵa deiin JOO qabyldaý komissiiasy júrgizedi. Doktorantýraǵa túsý emtihandary 4 - 20 tamyz aralyǵynda ótkiziledi.
COVID-19 pandemiiasy jaǵdaiynda aǵylshyn tilin bilý IELTS halyqaralyq testin dástúrli formatta tapsyrý múmkin bolmaýyna bailanysty QR Bilim jáne ǵylym ministri joǵary oqý orny túlekterine magistratýra men doktorantýraǵa túsý úshin Duolingo English test jáne IELTS INDICATOR tapsyrýǵa ruqsat beretin buiryqqa qol qoiǵanyn esterińizge salamyz. Magistratýraǵa túsý úshin Duolingo English test boiynsha shekti ball keminde 95, IELTS INDICATOR boiynsha keminde 6,0 bolýy tiis. Doktorantýraǵa túsý úshin Duolingo English test boiynsha shekti ball keminde 85, IELTS INDICATOR boiynsha keminde 5,5 bolýy kerek.
Shet tilin meńgergendigin rastaityn sertifikat doktorantýraǵa túsý úshin ǵana mindetti bolyp tabylatynyn atap ketken jón. Magistratýranyń bilim berý baǵdarlamalaryna túsý úshin halyqaralyq sertifikatty, sonyń ishinde Duolingo English Test, IELTS INDICATOR nemese keshendi testileý barysynda shet tilinen emtihan tapsyrýǵa bolady.
