Magistratýra boiynsha memlekettik bilim granty iegerleriniń esimderi belgili boldy, dep habarlaidy "Ult aqparat" Bilim jáne ǵylym ministrligine silteme jasap.
2021-2022 oqý jylyna arnalǵan magistratýra boiynsha bilim granttary iegeriniń tizimi jariialandy. Komissiia quramynda memlekettik organdar men úkimettik emes uiymdardyń ókilderi, jýrnalister, Qazaqstan stýdentteriniń aliansy jáne «Otandastar» qorynyń ókilderi boldy. Bilim berý granttary keshendi testileý (KT) nátijeleri boiynsha konkýrstyq negizde berildi.
Aita keteiik, ótken jylmen salystyrǵanda oqýǵa túsýshiler sany 2 myńǵa artyp, testileýge 36 myń adam qatysty.
Esterińizge sala keteiik, biyl ǵylymi-pedagogikalyq magistratýraǵa 12 329 grant jáne beiindik magistratýraǵa 500 grant bólindi. «Shet tili muǵalimderin daiarlaý», «Aqparattyq tehnologiialar», «Matematika muǵalimderin daiarlaý» jáne «Quqyq» baǵyttary suranysqa ie boldy. Barlyq grant iegerleri 28 tamyzǵa deiin joǵary oqý ornynyń virtýaldyq qabyldaý komissiialary arqyly JOO-ǵa qujattaryn tapsyrýy tiis.
