QR Mádeniet jáne sport ministrliginiń qyzmetkerleri birkúndik eńbekaqylaryn koronavirýspen kúreske kómek retinde aýdardy, dep habarlaidy "Ult aqparat".
«Qazaqstan Respýblikasynyń Mádeniet jáne sport ministrliginiń qyzmetkerleri birkúndik eńbekaqylaryn elimizdegi koronavirýstyń taralýyna qarsy kúreske kómek retinde aýdarýǵa sheshim qabyldady. Qazir koronavirýs indeti dúniejúzin teńseltip tur. Talai syndarly sátten, qinalǵan shaqtan eldegi aýyzbirshilik pen tatýlyqtyń arqasynda aman-esen shyqtyq. Bul synaqtan da muqalmai, shyńdalyp shyǵarmyz!» - dep atap ótedi ministrlikten.
Vedomstvo baspasóz qyzmeti búgin Qazaqstannyń Tuńǵysh Prezidenti Nursultan Nazarbaev el halqyna úndeý joldap, osyndai aýyr kezeńde memlekettik deńgeide qabyldanyp jatqan sharalar qazirgi qiyn ahýalǵa sai der kezinde qolǵa alynǵanyn aitqanyna nazar aýdartady. Barlyq qazaqstandyqtardy el Prezidenti Qasym-Jomart Toqaev pen Úkimet tarapynan iske asyrylyp jatqan shuǵyl sharalardy qoldaýǵa shaqyrǵanyn eske salady.
«Mádeniet jáne sport ministrligi elde qolǵa alynyp jatqan túrli saqtyq, aldyn alý sharalaryna ún qosyp, birkúndik eńbekaqylaryn elimizdegi koronavirýstyń taralýyna qarsy kúreske kómek retinde aýdardy. Jumyla kóterip, talai júkti jeńildetkenbiz. Bul joly da sondai aýyzbirshilikten ainymaiyq», - deidi ministrlikten.
