Foto: ashyq derekkóz
Qazaqstan Respýblikasy Týrizm jáne sport ministrligi qumar oiyndarǵa táýeldilik pen zańsyz oiyn biznesiniń taralýyna jol bermeý, halyqtyń túrli sanattary arasynda aldyn alý sharalaryn kúsheitý jáne táýeldi azamattarǵa keshendi kómek kórsetý baǵytynda atqarylyp jatqan is-sharalar týraly esep berdi, dep habarlaidy Ult.kz.
Jospar 4 negizgi baǵyt pen 28 naqty is-sharadan turady. Onyń ishinde mańyzdy baǵyttardyń biri – lýdomaniianyń aldyn alý. Atalǵan baǵyt boiynsha tómendegidei júieli sharalar iske asyrylýda.
Respýblikalyq deńgeide júrgizilgen áleýmettik zertteý barysynda qumar oiyndarǵa beiimdiliktiń sebepteri men taralý aýqymy anyqtaldy. Saýalnamaǵa elimizdiń barlyq óńirinen 5 998 azamat qatysty. Sonymen qatar oiyn biznesi salasyndaǵy jáne oǵan janama qatysy bar 20 sarapshymen suhbattar ótkizildi.
Zertteý nátijeleri boiynsha elimizde qumar oiyndarǵa táýeldi azamattardyń boljamdy sany anyqtaldy:
- litsenziiasy bar kazino men oiyn avtomattary zalyna – 459 444 adam;
- internet-kazinoǵa (elimizde tyiym salynǵan) – 484 055 adam;
- litsenziiasy bar býkmekerlik keńselerge – 456 276 adam;
- litsenziiasy joq býkmekerlik keńselerge – 494 019 adam;
- zańdy lotereia ónimderine – 491 710 adam.
Jastarmen jáne jasóspirimdermen júieli jumys júrgizilýde:
Oqýshylar, stýdentter jáne jastardyń basqa sanattary arasynda lýdomaniianyń aldyn alý boiynsha ádistemelik usynymdar ázirlenip, bilim berý uiymdary men múddeli mekemelerge taratyldy.
Bilim berý mekemelerinde qyzmet etetin 800-den astam pedagog pen psiholog úshin arnaiy oqytý uiymdastyrylyp, lýdomaniiamen kúresýdiń negizgi tásilderi túsindirildi. 6 000-nan astam mektep óziniń tárbie jumysynyń josparyna qumar oiyndar men internetke táýeldiliktiń aldyn alýǵa arnalǵan bólim engizdi.
Mektepter janynan Ata-analardy pedagogikalyq qoldaý ortalyqtary qurylyp, 1-11 synyp oqýshylarynyń ata-analaryna arnalǵan arnaiy baǵdarlama aiasynda aiyna eki ret ótetin, jalpy sany 24 sabaqtan turatyn kýrs qolǵa alyndy.
Qoǵamnyń ártúrli toptaryn qamtityn túsindirý jáne aǵartý sharalary:
Qazaqstan Musylmandary dini basqarmasy men basqa da dini birlestikterdiń qoldaýymen qumar oiyndardyń ziiany týraly 1 millionnan astam azamatty qamtyǵan 4 000-nan astam is-shara ótkizildi.
Ǵylym jáne joǵary bilim ministrligi jelisi boiynsha 2024 jyly jastar arasynda salamatty ómir saltyn nasihattaýǵa baǵyttalǵan «Salamatty ómir salty úshin!» fleshmoby, Densaýlyq festivali, «Birinshi kýrs stýdenti» spartakiadasy siiaqty 400-den astam is-shara ótkizildi.
Qorǵanys ministrligi tarapynan áskeri bólimder men mekemelerde 38 dóńgelek ústel, 7 konferentsiia, 14 jinalys, 16 919 áskeri qyzmetshimen jeke suhbat jáne áńgimelesý ótkizildi.
Keshendi jospardyń oryndalýy – qumar oiyndarǵa táýeldiliktiń aldyn alýǵa, halyqtyń psihologiialyq densaýlyǵyn nyǵaitýǵa jáne salamatty ómir saltyn qalyptastyrýǵa baǵyttalǵan mańyzdy qadam.
Týrizm jáne sport ministrligi bul baǵyttaǵy jumystardy múddeli memlekettik organdarmen, qoǵamdyq uiymdarmen jáne bilim berý mekemelerimen tyǵyz ózara is-qimylda jalǵastyra beredi.
